BOC mipasalig nga palambuon ang serbisyo sa airport

CEBU, Philippines — Gipasalig sa Bureau of Customs-Port of Cebu, nga mas palambuon pa ang mga serbisyo alang sa mga pasahero ilabi na sa tugpahanan.

Kini atol sa tigum niini uban sa Aboitiz InfraCapital Inc. ug GMR-Megawide Cebu Airport Corporation (GMCAC) diha sa Mactan Cebu International Airport (MCIA).

Mapasalamaton si BOC Cebu district collector Atty. Ricardo Uy Morales II sa gipakitang kadasig sa AIC ug GMCAC officials sa pagpaningkamot alang sa padayon nga pagpalambo sa mga serbisyo sa airport.

Suma pa ni Morales nga ang ilang partnership uban sa AIC ug GMCAC usa ka dakung kalamposan sa ilang tinguha nga mapahapsay ang negosyo, border protection, ingon man pagpalapad sa revenue collection.

“It will also pave the way for MCIA to offer passengers a seamless and delightful travel experience. Together, we aim to position MCIA as a global leader in airport service excellence,” suma pa ni Morales.

Kahinumduman ang MCIA nipaubos og dakung kausaban niadtong December 2022 dihang nakuha kini sa AIC.

Isip bag-ong airport operator, ang AIC pinaagi sa airport management, GMCAC, mitanyag og ONECOLS initiative diin nagpasabot og “One-on-One Collaborative Sessions”, nga gitumong aron mapahigayon ang constructive dialogues, pag-atiman sa mga concerns ug paghatag og mga importanteng kalambuan ug developments sa MCIA.

Ang mga gipangtuki tali sa customs, AIC ug GMCAC officials naglangkub sa customs compliance, uban ang lig-on nga tumong bahin sa pagdeklarar sa mga pasahero ug pag fill out sa Customs Baggage Declaration Form (CBDF) ingon man ang pagtuman sa tax obligations ngadto sa gobyerno.

Gituki usab sa tigum ang ka importante sa non-intrusive inspection pinaagi sa x-ray machines diha sa arrival area, nga gitumong aron malikayan ang pagsulod sa mga kontrabando ug ubang illegal nga butang dinhi sa nasud. — /MEL (BANAT NEWS)