P4 bilyon planong pundo alang sa sunod tuig sa Toledo

CEBU, Philippines —  Nikabat sa kapin P4 bilyones ang planong pundo sa Toledo City Development Council (TCD) alang sa Annual Investment Plan sa Siyudad sa Toledo sa tuig 2024.

Ang maong kantidad alang sa pagpundo sa gilaraw nga mga plano nga programa ug proyekto sa dakbayan sa sunod tuig.

Atol sa tigom sa council niadtong Oktubre 2, 2023 ang pangulo sa City Planning and Development Office Architect Daryl Carabio nagkanayon nga niabot sa P2.2 bilyones ang pundo alang sa general public services; P109.8 milyones sa social services nga sektor ug P441.5 milyones sa economic services ug P1.9 bilyonn aa local development projects/ programs.

Ang TCDC gilangkuban kini sa tanang punong barangay sa siyudad; chairman sa committee of appropriation sa Sangguniang Panlungsod (SP), district congressman ug non-government organizations nga nag-operate sa dakbayan.

Giumol kini alang sa pagduso sa mga annual socio-economic development plans ug polisiya sa dakbayan. BDB (BANATNEWS)