Senior citizen gitulis, gipatay
CEBU, Philippines — Patay na nga napalgan ang usa ka 64-anyos nga senior citizen nga gituohang gitulis ug pagkahuman gipusil diha mismo sa sulod sa iyang panimalay sa El Salvador Extension, Barangay Labangon, siyudad sa Sugbo.
Ang biktima mao si Virgilio Waskin, residente sa naasoy nga barangay ug nag-inusara lang nga nagpuyo sa iyang balay.
Matud ni Police Major Angelito Valleser, hepe sa Labangon Police Station 10, sa ilang tan-aw Biyernes sa gabii gihimo ang krimen.
Gitug-an ni Valleser nga gitulis ang biktima tungod kay gipanguha matud pa mga alahas niini nga mobalor og P100,000 ingon man kwarta nga P70,000.
"Tulis gyud na siya kay wala'y laing motibo sa kuan kay nawala iyang sing-sing," matud ni Valleser.
Nakaangkon matod pa ang biktima og samad pinusilan sa iyang ulo ug duha habig sa may baba niini.
Nagpahigayon na og follow up operation ang kapulisan sa Labangon Police Station aron madakpan ang mamumuno. (BANAT NEWS)
- Latest
