EDITORIAL - K-12 kinahanglan lang og suporta

Sa makausa pa, daghan gihapong mga wala makasabot unsa ka maayo ug unsa ka mahinungdanon para sa mga tinun-ang Pilipino ug para sa ilang pamilya kining gipatumang K-12 Program sa gobiyerno.

Ang K-12 Program gisugdan sa pagpatuman niadtong tuig 2012 nga ang tumong mao ang pag-overhaul sa sistema sa basic education sa Pilipinas. Gipalambo ang kindergarten ug gipun-an og duha ka tuig ang high school nga mao karon ang junior ug senior high school.

Daghan ang misaway sa sistema kay matud pa dili epektibo ug daghang kuwang. Kanus-a pa man gud dunay perpekto sa mga bag-ong kausaban nga himuon? Duna gyuy mga pagkulang apan wala kini nagpasabot nga dili na mapalambo pa .

Dunay survey sa Social Weather Stations (SWS) nga nagpakitang 39 porsiyento lang sa mga gipangutana ang “very satisfied” o “somewhat satisfied” sa programa.

Samtang 37 porsiyento ang nakaingon nga “very dissatisfied,” samtang 13 porsiyento ang “somewhat dissatisfied.” Duna say nuwebe porsiyento nga wala makadesider unsa ilang tan-aw  ug dunay dos porsiyentong wala gyuy ideya maong wala silay ikatubag.

Kaning mga surveys, pagkatinuod gamit kini kaayo sa pagkuha og opinyon sa publiko mahitungod sa usa ka isyu o hisgotanan.

Apan dili sab ikalimod nga kini pangkondisyon ra gyud sa hunahuna sa publiko aron maoy basihan unya sa umaabot pang plano nga mopahaom sa nagbayad sa pagpahigayon sa survey.

Ang Department of Education miangkon nga pakyas ang K-12 Program nga mahatag ang gitinguha nga maka-prodyus og “job-ready” graduates. Tinuod apan dako sab nga bakak.

Dunay mga senior high school (sagad sa public schools) sa mga dagkong siyudad ang naka-prodyus og job-ready graduates. Apan dunay uban wala.

Dunay mga eskuylahana nga nga kuwang sa pasilidad, laboratoryo, mga makinarya, mga magtutudlo ug uban pa apan mi-offer gihapon og senior high. Sagad niini mga pribadong mga eskuylahan nga di gustong mabiyaan.

Daghan sab niini sa public schools ilabi na sa mga hilit nga lugar. Ang sad-an mao mismo ang DepEd kay wala sila mohatag sa gikinahanglan aning mga public schools.

 Di kinahanglang ilisan ang K-12, kinahanglan lang kining suportahan kay kun ilisan napud, balik na sab sa uno ang tanan.