Kalihukan sa pista sa Talisay gibuksan na
CEBU, Philippines — Pormal nga gibuksan ang mga kalihukan sa kapistahan sa Dakbayan sa Talisay.
Si Talisay City mayor Gerald Anthony “Samsam” Gullas ug si kongresista Rhea Gullas maoy nangulo sa pagbukas sa pagsugod sa mga kalingawan alang sa kapistahan.
Ang siyudad sa Talisay magsaulog sa matag tuig nga kapistahan sa ilang patron nga si Sta. Teresa de Avila sa matag Oktubre 15. Si Gullas nibukas sa kalihukan sa kapistahan pinaagi sa paghiwa sa lechon ug pagkaon niini nga naila na sa tibuok kalibutan diha sa Talisay City Hall Night Market.
Matud pa sa mayor nga daghan nga kalingawan ang masaksihan sa Talisaynon lakip na dinhi ang Miss Talisay, Halad Inasal Festival ug ang libre nga concert.
Sigon pa ni Gullas nga dili mahutdan og kalingawan tungod kay dugay ra sila nangandam niini. Apan mipahimangno kini sa katawhan nga dili magmugna og kasamok.
Hinuon nimando na siya nga adunay mga kapolisan nga magbantay sa matag kalihukan.
Dugang pa niya nga likayan ang pagsul-ob o pagdala og mahalon nga butang nga maoy paboritong kuhaon sa mga kriminal.
“Let us make our fiesta celebration peaceful and orderly. Panahon ni nga magpasalamat ta nga gigrasyahan gyud ta sa Ginoo. Wala man ta gabawal nga magkiat-kiat pero always be mindful of your actions,” suma pa ni Gullas. (BANAT NEWS)
- Latest
