Transport sector sa CV wala pa katilaw sa Pantawid Pasada fuel subsidy—LTFRB-7

CEBU, Philippines — Hangtud karong mga panahona, wala pa gihapon makatilaw og fuel subsidy ang mga drayber sa public utility vehicles (PUVs) sa Central Visayas sumala pang Land Transportation Franchising and Regulatory Board-7 regional director Eduardo Montealto, Jr.

“Kadtong nahatagan na kay sa National Capital Region pa to, wala pa sa Central Visayas pero eventually mahatagan ra gihapon ang mga PUV operator sa region kay naa na man nay budget, ang pagpasulod na lang na sa fuel subsidy sa ilang mga cards,”    butyag pa sa direktor sa pakighinabi niini sa igsuong pamantalaan sa Banat News nga The Freeman.

Matud pa sa LTFRB moabot 63,864 PUVs sa nasud ang nahatagan na og subsidiya, apan wala pa dinhi.

“So far, wala pa mi nakadawat og fuel subsidy,” pamahayag pang Ryan Benjamin Yu, transport leader ug general manager sa Cebu Integrated Transport Multi-Purpose Cooperative (CITRASCO MPC).

Ang ahensiya mipasalig hinuon nga sa umaabot nga mga adlaw posibleng mahatag na kini.Dugay na kining gipaabot sa mga drayber ug operators apan naabtan nalang og election ban wala pa gihapon kini nila madawat.

Si LTFRB Chairperson Atty. Teofilo Guadiz III mibutyag hinuon nga exempted sa election ban ang paghatag sa subsidiya.

“Nagpapasalamat po kami sa agarang aksyon ng COMELEC sa aming petisyon at sa pang-unawa ng publiko lalo na ng ating mga stakeholder na naapektuhan ng pansamantalang delay sa pamamahagi ng fuel subsidy.,” pamahayag pang Guadiz.

“Tiyak naman po na magiging tuloy-tuloy na ang pamimigay natin ng fuel subsidy para makatulong sa ating mga stakeholder dulot ng oil price hike,”punod pa niya.

Ang Fuel Subsidy Program sa gobiyerno naapil kini sa General Appropriations Act of 2023, nagpasabot kini nga duna na kini gahin nga pundo gikan sa gobiyerno.

Sagad sa mga nakadawat na og fuel subsidy mao ang mga operators  sa Traditional Public Utility Jeepney (TPUJ) ug operators sa  Modern Public Utility Jeepney (MPUJ), Public Utility Bus (PUB), Mini-bus (MB), Tourist Transport Services (TTS), School Transport Services (STS), Filcab,  ug uban pang pangpublikong pasaheroan.

Sa sayo pa,  ang militanteng transport group nga Pagkakaisa ng mga Samahan ng Tsuper at Operator Nationwide Cebu Chapter (PISTON Cebu)  uban sa PISTON National Council misaway sa plano sa gobiyerno nga paghatag og one-time P6,500 fuel subsidy.

Matud pa niya dili solusyon ang fuel subsidy. Ang grupo ug mga kaalyado nilang militanteng pundok dugay na nanawagan sa pagbasura sa Oil Deregulation Law ug pagbayad og dugang buhis.

Matud ni Perez, ang mga drayber magkinahanglan og 30 litrong petrolyo kada adlaw, dugang kini nga gastos sa gamay nga kita sa pagpamasahero.

Kaning one-time P6,500 fuel subsidy  kutob lang og 18 ka adlaw, layo ra kaayo sa 11 ka semana nang sagunsong nisaka ang presyo sa petrolyo.

Kaning Pantawid Pasada Program o Fuel Subsidy program usa kini ka fuel vouchers  nga cash cards para sa kwalipikadong benepisaryong drayber nga usa sa mga flagship social mitigation measures sa gobiyerno. — The Freeman/IBM (BANAT NEWS)