Illegal settlers sa luna sa siyudad i-relocate
CEBU, Philippines — Gikatakdang i-relocate ang mga illegal settlers sa Barangay Suba Block 2 ubos sa Slum Improvement Resettlement (SIR) human nasayran nga dili sila ang orihinal nga mga benepisyaryo sa lote nga gipanag-iya sa siyudad.
Si Division for the Welfare of the Urban Poor (DWUP) Assistant Executive Director for Operations, Teofilo Jun Rosaroso niingon human sa consultative meeting alang sa pagpatuman og sistema human nasayran nga adunay mga mismanagement sa maong programa.
"Nagpahigayon mi og meeting sa mga occupants sa SIR kay para mahapsay na sila kay daghan jud diha dili na maoy awardee sa lote ug daghan nakasulod nga wala na mag agi sa among office sa city hall. And uban delinquent sa monthly installment ang uban wala jud nakabayad since 1986 pa," matud ni Rosaroso.
Matud pa ni Rosaroso nga aduna pay laing mga residente nga namaligya sa ilang nadawat nga lote nga makonsiderar nga ilegal tungod kay ang maong lugar gipanag-iya sa gobiyerno.
Aron matubag kini, nagpahigayon og piniliay og mga opisyal aron maoy modumala sa lugar nga motabang sa opisyales sa SIR ug ingon man sa pagpahunong sa pagdaghan sa mga illegal occupants.
Ang maong consultative meeting gihimo usab aron matino ang gidaghanon sa mga residente nga adunay nay mga titulo.
“Sa wala p,a ug sa mga wala jud makaparehistro sa among office, which we have to address aron matabangan sila sa ilang problema kabahin sa ilang occupied lots,” matud ni Rosaroso.
"Kay luoy sad until now wala pa makatitulo bisag fully paid ang uban. Ang uban naundang tungod sa kalibog sa pagdumala sa maong programa sa city," dugang pa niya.
Si Rosasoro miingon usab nga ilang unahon ang mga qualified beneficiaries samtang kadtong gikonsiderar nga illegal settlers ipaubos sa relokasyon.
Matud niya, aduna nay existing housing sites ang siyudad nga mamahimong lugar nga kabalhinan. Hinuon siya nidugang nga anaa ra gihapon sa management kun dawaton ba sila niining mga lugara
"May future MRB (medium rise buildings) under sa Pabahay Program ni Presidente Bongbong (Marcos), pwede sila didto pero we know it will take time kay tukoron pa man. Mao nga di namo sila i-relocate didto unless ready na ang facility," dugang pa ni Rosaroso. — /IBM (BANAT NEWS)
- Latest
