Babayeng dalaw gipugngan

CEBU, Philippines — Usa ka 28-anyos nga babayeng dalaw ang gipugngan sa Cebu City Jail Male Dormitory human adunay natagak nga paketeng dunay sud nga gituohang shabu atol sa paginspeksyon kaniya sa dihang padung kining modalaw.

Ang maong babaye nga taga Barangy Proper Ermita, siyudad sa Sugbo wala tugoti nga makalahos sa visiting area apan wala sab tuguti nga makagawas hangtud dili masigurong dili ilegal nga drugas ang sulod sa paketeng natagak gikan sa iyang  bra dihang gihiling.

Ang nakitang pakete ipaubos og eksaminasyon sa Philippine Drug Enforcement Agency (PDEA)-7.

"Amo siya ibalhin sa police station, duol nga police station diri, pending sa result, depende man gud sa trabaho sa PDEA, ang pinaka gamay usually one day," sigon pa usa sa mga kawani sa Cebu City Jail Male Dormitory.

Ang babaye moduaw sa iyang live-in partner nga napriso sulod sa tulo ka tuig tungod sa kasong kalapasan sa Section 5 ug 11 sa Republic Act 9165 o Dangerous Drugs Act.

Ang maong babaye hugot nga mihimakak nga drugas ang nakuha gikan kaniya. Matud niya tawas kadto nga tagpisohon nga iyang gipalit sa tindahan.

Matud niya sagol niya kini sa tubig nga panghugas sa pribadong parte sa iyang lawas aron mokubol kay nasige pa siya og dug okay bag-o pang nanganak.

Si Jail Officer 3 Blanche Aliño, tigpamaba sa Cebu City Jail Male Dormitory mipasabot nga dunay proseso nga gisunod alang sa mga dalaw.

Moadto ang dalaw sa registration area kun asa ang biometric systems, beripikahon sila ayha susihon ang ilang mga gipangdala, ukayon face to face aron kun dunay kontrabando makakita gyud sila nga wala kini gibutang-butangan lang.

Isunod dayon ang body searching, kun lalake ang dalaw, lalake sab ang mo search ug kun babae ang dalaw, babae sab ang mo search.

Giklaro ni Aliño nga dunay waiver nga pirmahan ang mga dalaw nga mosugot sila sa strip search o huboan, ang di mosugot di pasudlon.

"With that mo proceed sila ngadto sa searcher nato nga babaye so didto na maghubo na sila although dili gyud sila hikapon, maglantaw lang gyud sa pakita sa ilang bra, sa ilang panty, sila ra mopakita, kani mao gyud ni among i-follow," ni Aliño pa.

Apil sab sa tan-awon og maayo ang pribadong parte sa lawas kay ayha kasagaran ipasok ang mga kontrabando. (BANAT NEWS)