Tattoo Artist gi-salvage

CEBU, Philippines —  Patay nang napalgan ang usa ka tattoo artist nga gituohang gi-salvage ug napalgan diha sa kilid sa dalan sa Barangay Campo 7, sa lungsod sa Minglanilla kagahapon sa buntag.

Si Police Staff Sergeant Richel Antipuesto, imbestigador sa Minglanilla Police Station nibutyag nga ang mga tinun-an nga padung mangeskuyla maoy unang nakakita og mga basiyo sa bala diha sa dalan.

Tungod sa panguryoso namasin sila og pagpangita og naa pay laing basiyo apan sunod nilang nabangalan ang wala mailhing lalaking naghigda ug wala nay kinbabuhi.

Daling gipahibalo sa mga bata ang mga tawo sa lugar kinsa mao say nanawag sa kapolisan.

Paglabay og pipila ka oras, usa ka Grace Abadilla ang naabot sa crime scene ug positibong miila sa biktima nga kiini iyang pag-umangkon nga si Dhinz Adzyl Abadilla Zabala, 32,  taga Sitio Tangkongan, Barangay Sambag 1, sa Siyudad sa Sugbo.

Si Antipuesto nitataw nga sa ilang insyal nga pakisusi , adunay nakamatikod nga dunay duha ka motorsiklong  nihunong sa maong dapit nianang kaadlawon.

Mingaw ang dapit tungod kay walay mga panimay nga naa sa duol. Tulo ka kabhang sa wala pa matino nga bala ang narekuber sa crime scene.

Asoy pa ni Antipuesto nga iyang nakita nga adunay agi og pinusilan ang ulo sa biktima nga gituohang maoy nakapakutlo sa iyang kinabuhi.

Ang iyaan mitug-an sa kapolisan nga drug surrenderee ang iyang pagumangkon duha ka tuig na ang milabay.

Nagbag-o kini sa kinabuhi sa dihang aduna na kini kapuyo ug nipokus kini sa iyang panginabuhian isip usa ka tattoo artist.

Nagkanayon si Antipuesto nga tanan anggulo ang iyang tan-awon aron sa pagtumbok sa responsable sa krimen. IBM (BANATNEWS)