Bianca Lee nakontrobersiya na pud

CEBU, Philippines — Kontrobersiyal nga babayeng giingong dunay kasayoran sa nahitabo sa gipatay nga si Rhea Mae Tocmo gireklamo nga wala kini nibayad sa gi-check-inan niini ug gipasanginlan sab nga nang-scam.

Apan sa pagsusi sa kapolisan, wala tanay kamatuoran ang tanang gipasangil batok sa maong babaye. Apan tinuod nangayo kini og tabang ug kini gihatagan sa nagreklamo.

Una niini, ang mga sakop sa Carbon Police Station sa Cebu City miresponde sa tawag gikan sa usa ka lodging house sa dalan Leon Kilat kay matud pa adunay ni-check in nga wala mobayad.

Sa impormasyon nga gihatag sa kapulisan, matud pa ang gireklamo mao si Jenny Jane Villegas nga giingong mao sab si Bianca Lee ug ang uyab niini.

Matud ni Police Lt. Col. Rafter, Deputy City Director for Operations ug tigpamaba sa Cebu City Police Office (CCPO), ilang nasuta nga wala lang magkasinabot ang outgoing ug incoming nga duty sa counter sa maong lodging house.

Giingong nakabayad na silang Villegas sa dihang sila mi-check-in. Ang duha migawas kadiyot apan sa ilang pagbalik dili na sila pasudlon balik sa ilang lawak kay matud pa wala pa sila nibayad, apan diay to, nakabayad na sila sa unang ni-duty nga kahera apan wala mapahibalo daan ang nirelibo.

Gawas niana, si Lee o Villegas gireklamo sab nga nang-scam og P1,000 apan sa pagsukit-sukit sa mga polis sa tawong mireklamo nasuta nga boluntaryo kining nitunol sa maong kantidad human gi-chat ni Lee nga mangayo kini og tabang pinansiyal kay gamiton para sa iyang seguridad.

“Base sa convo nakita sa atong investigator, ‘mangayo ko’g hinabang’ or something along that line nga naa gyuy term nga mangayo og hinabang kay moadto og usa ka establishment to secure herself…So, diha pa lang nangayo man siya, wala gyud tay nakitang violation so nihatag man ang usa ka tawo so dili gyud siya maka claim nga gi-scam siya kay the fact nga nangayo imong gihatagan I think wala gyuy element sa krimen, ni respond ka sa iyang pangayo,” pasabot ni Rafter.

Matawag nga scam kun giilad sama nalang kun nibayad og kwarta apan walay produktong nahatag ang nidawat sa kwarta. IBM (BANATNEWS)