Desalination plant sa Cordova mahuman karong Disyembre

CEBU, Philippines —  Hayan mapahimuslan na ang 3.5 hectare nga Cordova desalination plant diha sa lungsod sa Cordova, kini tungod kay 70 porsyento na kini nga nahuman ug posibleng matapos karong buwan sa Disyembre ning tuiga.  Kini iya sa Isla Mactan Cordova Corporation IMCC ug maisip nga labing una ug labing daku nga desalination plant sa nasud nga nahimutang diha sa barangay Poblacion, Buagsong, ug Catarman.

“Malipayon kita nga ang LGU Cordova nahimong part sa history sa country’s first and biggest desalination plant. Dako usab kini nga matabang sa income sa lungsod which in turn will be converted to giving Cordovanhons basic services," suma pa ni Cordova Mayor Cesar Suan atol sa installation ceremony sa mga ekipos sa maong planta.

Ang maong kalihukan gitambongan usab ni Cebu Governor Gwendolyn Garcia, Senate President Juan Miguel Zubiri, Senator Risa Hontiveros ug ubang local officials.

Gidayeg sa duha ka senador ang IMCC, usa ka subsidiary sa Vivant Corp., gumikan sa ilang commitment nga pagbubu og dakung capital alang sa patigayon nga naglantaw alang sa nag-unang panginahanglan sa katawhan nga mao ang tubig. Segun sa tahu sa Sugbo News, ang Facebook page sa Cebu Provincial government, ang maong desalination plant makahatag og moabot sa 20 million liters sa potable water matag adlaw nga mahimong mapadak-an ngadto sa 50 million liters, nga daku og tabang sa problema sa kanihit sa tubig sa Metro Cebu.

Ang maong desalination plant usa ka produkto sa public-private partnership ubos sa build-operate-transfer scheme.

Itugyan sa IMCC ang pagpanag-iya sa maong planta ngadto sa lungsod sa Cordova human sa 25 ka tuig nga pag operate niini nga daku og matampo alang sa panudlanan sa lokal nga kagamhanan. Gikan sa The Freeman/MEL (BANAT NEWS)