DENR excavation operation sa  illegal dump site nabaraw sa TRO

CEBU, Philippines — Wala madayon ang excavation operation sa mga sakop sa Department of Environment and Natural Resources (DENR) sa Rehiyon 8 sa gialegar nga illegal nga dumping site sa sud sa Palompon Watershed and Forest Reserve nga usa ka protected area sa Palompon , Leyte tungod sa temporary restraining order nga giluwatan sa lokal nga korte.

Ang DENR miadto sa lugar aron pagsusi bahin sa alegasyon nga ang maong dumping site gihimong labayanan sa mga biya sa giihaw nga mga manok gikan sa poultry farms nga DBSN Farms Agriventure Corporation sa lungsod sa Albuera ug Zachary Farms sa Palompon nga gialegar  sa nga gipanag-iya ni Palompon Mayor Ramon Oñate.

Si Ma. Dioleta Vilas, ang assistant chief sa DENR Survey and Mapping Division miingon sa interbyu kaniya sa Philippine News Agency niadtong Sabado, magpaabot pa sila og direktiba gikan ni regional executive director Lormelyn Claudio unsay sunod buhaton tungod sa maong TRO. Nasayran nga niadtong Agosto 25, 2023 gikatahong gipadad-an og suwat ni Claudio si Oñate sa plano sa ilang buhatan nga kuykuyon ang gipasangil nga ilegal dumping site nga naa nahimutang sa bukirang bahin sa Barangay San Joaquin niadtong Biyernes Septiyembre 6 hangtud 8.

Apan hapon sa Septiyembre 8 ang Regional Trial Court (RTC) Branch 17 sa Palompon gikatahong mipagawas og temporary restraining order (TRO) nga nagpakgang sa DENR aron kuykuyon ang nahisgutang lugar.

Sa wala pa mogawas ang TRO, ang DENR-8 nangayo ng daan og seguridad gikan sa PNP ug sa AFP alang sa pagabuhatong excavation aron malikayan nga dunay moulbong kagubot. Apan walay nangabot nga polis o sundalo sa lugar.

Giimbitar sab sa DENR-8 ang pipila ka mga sakop sa media aron mokober sa kalihokan, apan wala sila pasudla sa site.  Matud pa gibarikadahan og mga sakyanan ug mga motorsiklo ang dalan padung sa site ug gibantayan kini og mga nakasibilyang mga tawo.

Si John Kevin Pilapil, radio anchor sa Blue Radio miingon nga dunay pipila ka mga tawo sab ang tuyong gibangilan og bato ang ilang mga ligid.

"I was there to cover the official activity of the DENR. We were harassed and decided to leave the hostile area,” matud pa niya.

Kun mahinumdoman, adunay gihimong inquiry sa House of Representatives niadtong Mayo 31 nga gipatawag ni Leyte 4th district Rep. Richard Gomez diin iyang ginganlan si Oñate nga maoy nagpatukod sa moang  dumping site sa sud protected area sa Palompon Watershed Forest Reserve.

Apan si Oñate sa pakighinabi sa mga tigbalita niadtong Sabado, miingon nga gi-dismiss na niadtong tuig 2019 sa RTC ang kasong violation of environmental laws.

“They filed a motion for reconsideration and it did not succeed and turned down by the court. Now, they have filed a motion for reconsideration in the Court of Appeals (CA), so pending the resolution of the CA with the due respect it is supposed to be, they can be liable for subjudice because it is still pending,” matud pang Oñate. Ang RTC gikatahong mohimo og summary hearing karong Septiyembre 21 kun gikinahanglan pang lugwayan ang TRO. — /IBM (BANAT NEWS)