Simala Shrine gidagsa na sa debotos kagahapon

CEBU, Philippines —  Gidagsa sa mga deboto ang Simala Shrine sa Barangay Lindogon, Lungsod sa Simala kagahapon diin bisperas kini sa kasaulogan sa birthday ni Birhen Maria.

Adunay mga misa nga gipahigayon ug pagka-alas 11:00 sa gabii gipahigayon ang mañanita alang kang Birhen Maria diin adunay giandam nga programa.

Karong adlawa, sa alas 10:00 sa buntag ipahigayon ang Misa Pontipika nga pangulohan ni Cebu Archbishop Jose Palma ug sa alas 6:00sa gabii ipahigayon ang prosesiyon sa kapin 70 ka karosa sa Birhen gikan sa lain-laing dapit sa Pilipinas.

Atol sa pagbisita sa Simala Shrine gidili ang pagdala og mga charger, power bank, ug pagsul-ob og mga sinina nga mugbo kaayo.

Gidasig usab ang mga deboto nga dili magduha-duha sa pagduol diha sa mga libre nga pagkaon nga gitanyag sa mga sponsor kong ugaling panggutomon sila.

Gidasig ni Brother Rogelio Largo, Jr. ang mga biyahedor nga padulong sa habagatan nga bahin nga moagi sa Simala karong adlawa nga mo sayo sa pagbiyahe tungod kay makasinati sila og kahuot sa kadalanan.

Sa pagsubay sa Banat News ug DyRF1215 adunay pipila ka mga booth nga gipahimutang diha sa ubos nga bahin sa shrine alang sa libre nga pagkaon nga gipanghatag.

Hugot usab nga seguridad ang gipatuman sa maong dapit diin susihon nila ang mga tawo nga mosulod sa Shrine. 

Daghan sa mga magtutuo nga nibisita sa shrine ang mapasalamaton sa tanang grasya nga ilang nadawat gikan ni Birhen Maria ug sa gasa sa maayong panglawas. — BDB (BANATNEWS)