KBP Month hingpit na nga gibuksan

CEBU, Philippines — Hingpit nang gibuksan ang usa ka bulan nga kalihokan sa Kapisanan ng mga Broadcaster ng Pilipinas Cebu Chapter kagahapon.

Subay sa mga kalihokan adunay gipahigayong parada kagahapon sa buntag nga nanukad diha sa Plaza Independencia padulong sa University of San Carlos Downtown Campus diin gipahigayon ang Santos nga Misa nga gipangulohan ni Father Kristo Suhardi SVD.

“As broadcaster, let us strive to be pure and righteous from within our minds. Often, we focus too much on improving our physical appearance and forget to improve the quality of our minds. People will get bored with a beautiful face, but they will never get bored with a kind heart”, tipik sa homiliya ni Suhardi.

Human sa misa gipahigayon dayon ang mga nagkadaiyang kaliokan ug games lakip na ang pagpili sa Mr. and Ms. KBP 2023.

Ang nigawas nga mananaog sa Mr. and Ms. KBP mao sila si Gabriel Miranda sa iFM 93.9 ug Meljean Mampandig sa Yes the Best 91.5.

Ang maong kalihokan gitambongan sa kapin sa 20 ka radio stations sa Sugbo.

Ang Presidente sa KBP Alan “Abay Mon” Montesclaros mapasalamaton sa tanang  nahimong kabahin sa kalamposan sa pagbukas sa maong kalihokan ug sa tanan mga nagpaluyo aron kini magmalamposon.

Matud ni Montesclaros nga ang radyo sa Sugbo padayon gihapon nga buhi ug nagpadayon pa gihapon nga nagsangyaw sa maayong balita.

Ug ang social media tools kini aron gamiton sa mainstream media ug dili kini kapompetinsiya aron mapaabot pa sa katawhan nga maserbisyohan.

Si Montesclaros nipadayag nga karong tuiga ang tema sa KBP Cebu mao ang “Padayong Muasdang Paghatud sa Kamatuoran Taliwala sa Kabag-ohan”. — /BDB (BANAT NEWS)