Frasco: Kalamboan sa turismo patas para sa tanang rehiyon

CEBU, Philippines — Si Department of Tourism Secretary Christina Garcia Frasco nagkanayon nga ubos sa Marcos administration ang kalamboan sa turismo patas kini sa tanang rehiyon diin ang departamento mopalapad sa ilang cruise tourism portfolio sa sunod tuig lakip ang mga pantalan sa Sugbo.

Niining ulahi lang, si Frasco kinsa nitambong sa kalihokan sa Congressman Duke Frasco Friendship Run and Run ngadto sa Santiago Bay sa Camotes Group of Islands sa Sugbo nihatag ug gibug-aton sa viability sa maong grupo sa mga isla isip usa ka ideal nga destinasyon alang sa sports tourism ug alang usab sa cruise tourism. Sa iyang pakigpulong, si Frasco nagkanayon nga ang sports tourism adunay dakong potential sa nasud tungod kay adunay mga nindot nga destinasyon ang Pilipinas diin pwedeng ipahigayon ang mga event lakip niini ang taas nga baybayon sa Lungsod sa San Francisco. Gawas niini, ang isla aduna usab kini tourist attraction sa silingang mga lungsod sa Tudela, Poro ug Pilar.

Niabot ngadto sa 1,000 ka cyclists ug runners ang nagtapok atol sa nahisgutang kalihokan.

Gipasalamatan usab sa DOT chief ang mga partisipante sa kalihokan diin gipadayag niiini nga ang ilang paggasto samtang anaa sila sa isla makapausbaw sa lokal nga ekonomiya, nakabenepisyo sa halapad nga han-ay sa stakeholders sa turismo lakip na ang mga local hotel, vendors, suppliers, boatmen, transport operators ug uban pa.

Ang ubang mga opisyal nga nitambong sa local sports event gathering naglakip nila ni Deputy Speaker Duke Frasco, DOT Undersecretary Ferdinand Jumapao, Cebu 5th District Board Member Mike Villamor, Mayors Alfred Arquillano (San Francisco), Gary Rama (Poro), Manuel Winky Santiago (Pilar), Greman “Jojo” Solante (Tudela), Aljew Frasco (Liloan), Bise Mayor Richard Streegan sa Sogod, ug ubang opisyales sa lokal nga kagamhanan. — /BDB (BANAT NEWS)