P5 milyones reward ihatag sa makatudlo sa nahimutangan sa magtiayong negosyante

CEBU, Philippines — Nikabat na ngadto sa P5 milyones ang reward money nga ihatag ngadto sa mga indibidwal nga makahatag og impormasyon sa nahimutangan sa magtiayong negosyante nga sila si Jerlyn Joyce ug Lorenzo Baltonado, Jr. ug Michelle Go Chu.

Kini maoy gipahibawo ni Atty. Francisco Amit, Jr., abogado sa negosyanteng si Kaiser Tan dihang nahinabi kini sa mga tigbalita sa niaging adlaw.

Ang unang reward money nga gipagawas kaniadto nikantidad kini og P1 milyon dayon nahimong P1.5 milyon ug karon P5 milyones na tungod kay aduna pay laing negosyante nga usa ka abogado ang nisang-at usab og kaso batok sa magtiayong Baltonado ug ni Chu.

Nagkanayon si Amit nga nalutsan na usab og warrant of arrest ang bana ni Michelle Go Chu nga si LLoyd Lawrence Chu tungod sa kasong estafa niadtong Agosto 14, 2023 diha sa Regional Trial Court (RTC) Branch 17 sa Dakbayan sa Sugbo ug Branch 29 sa Siyudad sa Toledo hinungdan nga mahimo na usab kining itaho ngadto sa kapolisan ang nahimutangan niini.

Niadtong Enero 13, 2023 ang magtiayong Baltonado ug Go Chu nalutsan og warrant of arrest sa RTC Branch 29 sa Toledo City tungod sa kasong large scale estafa.  Niadtong Pebrero 14, 2023 gibakwi sa korte ang warrant of arrest ni Go-Chu human gipaboran sa korte ang petition niini nga isuspenso ang iyang warrant tungod kay giingong wala moagi sa preliminary investigation ang kasong iyang giatubang.

Nunot niini, gimandoan usab sa korte ang Toledo City Prosecutor's Office sa pagpaubos sa kaso sa reinvestigation.

Apan human sa gipahigayong reinvestigation nasuta nga adunay probable cause ang pagpasaka og kaso batok ni Go Chu hinungdan nga nalutsan na usab kini og laing warrant of arrest niadtong Mayo 15, 2023. Gibutyag ni Amit nga gibasura sa 18th  Division sa Court of Appeals ang petisyon nga giduso sa kampo ni Go Chu sa pagpakawalay bili sa warrant of arrest niini nga unang giluwatan sa Branch 29 sa Toledo City.

Sa desisyon sa Court of Appeals gihatagan og 15 ka adlaw o dili molapas sa Mayo 30, 2023 si Go Chu sa pagsang-at og motion for reconsideration dihang nadawat niini ang warrant of arrest nga giluwatan sa korte apan petition for certiorari ang gi-file niini niadtong Hunyo 22, 2023.  (BANAT NEWS)