Mga pribadong karsada sa Talisay gisemento

CEBU, Philippines — Dili lang pampublikong karsada ang gipangsemento sa kagamhanan sa Dakbayan sa Talisay kundi lakip nasab ang mga pribado.

Kini pinaagi sa proyekto ni mayor Gerald Anthony “Samsam” Gullas inabagan sa pribadong kompaniya.

Si Gullas nihimo sa proyekto nga Alayon Pavements Bayanihan Project didto sa Sarihville Homeowners Association sa Barangay Poblacion diin moabot sa 260 metros ang ilang sementohon.

Gipasabot ni Gullas nga adunay mga higayon nga sila sa gobyerno dili makagahin og pundo sa proyekto tungod kay ang karsada dili man iya sa gobyerno.

Apan pinaagi sa pagtabang sa pribadong kompaniya nga makatampo og materyales alang sa pagsemento mao kini ang tubag sa dugay na nga problema sa mga molopyo sa lugar.

Iyang giklaro nga sa pribado nga yuta walay pundo sa gobyerno ang nagasto kundi gikan lang kini sa mga kompaniya pinaagi sab sa ilang corporate social responsibility.

Sa laing bahin padayon gihapon ang pagpanglimpyo sa mga kanal sa Dakbayan sa Talisay.

Suma pa ni Gary Togonon, pangu sa Aksyon Agad Team nga adunay kalit-kalit nga pag uwan nga mao sab ang hinungdan sa pagbaha hinungdan nga sila padayon sa pagpanglimpyo sa mga kanal.

Ilang gilimpyohan ang kanal duol sa sementeryo nga maoy usa sa grabe nga suliran sa dapit tungod sa balik-balik nga basura.

Nakahipos sila og 30 ka sako nga basura diha lang sa mao nga kanal.

Asoy pa ni Togonon nga gawas sa mga kanal moresponde sab sila og bisan unsa nga tawag gikan sa mga Talisaynon nga nagkinahanglan sa ilang tabang. (BANAT NEWS)