LTO nagdugang og deputized agents alang sa road safety
CEBU, Philippines — Nagdugang og 60 ka deputized agent ang Land Transportation Office (LTO)-7 aron masiguro nga ang road safety naimplementar sa mga motorista sa rehiyon-7.
Ang mga deputized agent gipuno kini sa existing nga 81 ka deputized agents sa Central Visayas nga mopatuman sa Akta Republika 4136 kun “Land Transportation Code of the Philippines” ug ubang traffic laws, rules ug regulations.
Matud ni LTO-7 Director Glen Galario nga ang maong mga bag-ong deputized agent gikan sa nagkalain-laing district ug extension offices sa ahensiya sa rehiyon.
"These are existing personnel of LTO 7 from our district and extension offices in the region trained for deputization and are now able to utilize our electronic Temporary Operator's Permit handheld mobile devices”, matud ni Galario.
Nagkanayon usab ang direktor nga ang maong mga personnel gipaubos sa duha ka adlaw nga training sa Sugbo diin gihatagan usab sila og tsansa nga makahimo og immersion sa wala pa sila hingpit nga ni-operate sa ilang geographical areas of responsibility (GAOR).
Gipakigtagboan ni Galario ang mga bag-ong deputized agents atol sa Regional Deputation Training and Retooling in the Operations ug Utilization sa Electronic Temporary Operator’s Permit (e-TOP) handheld mobile device niadtong Agosto 25 ug 26, 2023.
Niining buwana, ang LTO-7 adunay 141 ka deputized personnel, 64 niini gikan sa nagkadaiyang enforcement agencies sama sa Philippine National Police ug Land Transportation Franchising and Regulatory Board (LTFRB)-7.
Niadtong buwan sa Mayo karong tuiga gihapon, ang Department of Transportation ug World Health Organization uban ang road safety partners nilusad sa Philippine Road Safety Action Plan 2023-2028.
Tinguha sa Philippine Road Safety Action Plan 2023-2028 nga mokunhod ang gidaghanon sa disgrasya sa kadalana sa nasud ngadto sa 35 porsyento sa tuig 2028. BDB (BANATNEWS)
- Latest
