DTI: Presyo sa school supplies nisaka hangtud P7

CEBU, Philippines — Presyo sa mga school supplies sa ubang mga tindahan sa Dakbayan sa Sugbo ang nisaka og P3 ngadto sa P7 matud pa sa Department of Trade and Industry kon DTI.

Giklaro hinuon sa Division Chief sa Consumer Protection sa maong ahensya nga si Ines Cajegas nga wala kini molapas sa gilatid nga presyo ang maong giingon nga pagsaka.

Dugang pa sa opisyal sa DTI, aduna gayud pagsaka sa mga palaliton ilabi na usab nisaka ang kompra diin uban nga gigamit niini nga mga produkto imported.

Sa pagsubay sa Banat News/DyRF1215 sa may dalan Magallanes, adunay daghan nang mga tawo ang namalit og mga school supplies alang sa gikatakdang pag-abli sa klase karon umaabot nga Agusto 29 sa tanan mga pampublikong tulonghaan.

Gani aduna gikan pa sa lagyong dapit sa probinsya ang tuyo nianhi sa sugbo aron sila maka barato-barato.

Usa sa mga tagdumala sa tindahan sa mga school supplies nitug-an nga nagpabilin pa karon ang naandan nilang presyo sa pagka karon saglit kadtong mga existing stocks pa lang ang gipamaligya niini.

Ang writing notebook nga 80 leaves mapalit lang sa presyo nga tag P20, ang intermediate pad tag P37, yellow pad tag P50, apan adunay mas ubos depende hinoon sa mga brand, ang ballpen naay tag P5ang buok, ang krayola tag P30 ngadto sa P70, pulos mga nontoxic o luwas kini nga gamiton.

Apan ang maong tindera nipadayag nga kung mahurot na ug ang ilang ihulip mga bag-ong supply posibleng mosaka na usab ang presyo tungod kay mahal man usab ang ilang kompra sa mga tinubdan.

Ang mga uniform diha gipanbaligya daplin sa mga sidewalk aduna usab silay mga promo diin ang uban mihatag P10 ngadto sa P20 ang diskwento. (BANAT NEWS)