MCTOA dili na mopasaka og bag-ong fare hike petition

CEBU, Philippines — Dili na mopasaka og bag-ong farehike petition ang mga taxi operators dinhi sa Sugbo og magpaabot na lang sa desisyon sa motion for reconsideration nga ilang gisang-at sa Land Transportation Franchising and Regulatory Board (LTFRB) Central Office.

Nasayran ang ilang motion nga gipasaka sa miaging tuig nagtinguha nga umentohan ang flagdown rate ug mahimo na nga P70 gikan sa kasamtangan nga P40.

“Di na mi mo file og bag-ong petition kay magpa abot na lang mi sa LTFRB sa ilang ruling sa among motion for reconsideration,” suma pa ni Chiquito Obeso ang vice president sa Metro Cebu Taxi Operators Association (MCTOA) dihang nahinabi sa The Freeman.

Ang Philippine National Taxi Operators Association mao ang ni-file og petition alang sa umento sa peltihan sa taxi ug ang MCTOA usa sa miyembro sa maong asosasyon.

Suma pa ni Orbiso nga dihang nangayo sila og P30 nga umento sa flagdown rate niadtong tuig 2021, ang LTFRB mihatag lang og P5.00 nga increase.

 “Mao na nga nipasaka mi og motion for reconsideration kay gamay ra kaayo ang singko. Sukad ato wala nay balita ang LTFRB. Karon kay nagsigi na man sad og saka ang presyo sa gasolina, mao na na nga revive na sad,” dugang pa ni Obeso.

Si Ryan Benjamin Yu, transport leader ug general manager sa Cebu Integrated Transport Multi-Purpose Cooperative (CITRASCO MPC) miingon nga ilang gisuportahan ang baruganan sa MCTOA.

Ang CITRASCO adunay 200 ka taxi units nga nag operate dinhi sa Sugbo.

Si LTFRB-7 regional director Eduardo Montealto sa iyang pamahayag miingon nga sa pagkakaron dunay 6,400 taxi units nga nag operate sa Central Visayas ug kadaghanan niini ania sa Cebu.

Suma pa ni Montealto nga niadtong September sa miaging tuig, ang LTFRB mitugot og P5.00 nga umento sa flagdown rate gikan sa P40.00 ngadto sa P45.00. apan wa gi implementar sa mga taxi operators ug drivers kay hasulan na sila mag calibrate na sad sa ilang taxi  meters.

“Depende na gyud na sa among Central Office kung pasakahan ba nila ang pletehan sa taxi ug pila pud kung naa man gani increase kay daghan pa na sila mga data nga tan-awon,” dugang pa ni Montealto. — Gikan sa The Freeman/MEL (BANATNEWS)