E-library gibuksan na sa lungsod sa Minglanilla

CEBU, Philippines — Mahimo nang mapahimuslan sa mga tinun-an sa lungsod sa Minglanilla ang bag-o lang gibuksan nga Electronic Library (E-Library) sa lungsod.

Ang pormal nga pagbukas niini gitambongan ni Minglanilla mayor Rajiv Enad, bise mayor Lani Peña ug mga sakop sa konseho kinsa nihimo sa ribbon cutting niadtong Domingo.

Ang proyekto gi implementar sa Local Youth Development Office pinangulohan ni Jay Fernandez.

Ang maong fully airconditioned nga center gitukod aron makahatag og pag-abag sa mga tinun-an sa ilang pagtuon.

Mokabat sa 20 ka computer units nga dunay free access sa internet ang magamit sa mga tinun-an nga libre.

Dili na usab ma problema ang mga tinun-an kun dunay gikinahanglan sa printing material tungod kay libre usab kini sa maong center ug dugang niini aduna usab kini study area nga adunay kaugalingon nga comfort room ug bukas kini gikan sa Lunes hangtud sa Sabado.

Wa sab magduha-duha si mayor Enad sa paghatag og syento por syento nga suporta ilabi na sa pinanyal nga aspeto sa pagtukod sa maong proyekto.

Gikalipay sa kagamhanan nga matagaan na og katumanan ang paghatag og libreng pagprinta, pag gamit sa mga computer ug uban pa alang sa kabatan-onan.

Ang pag gamit sa E-Library dako og katabang sa mga magtutudlo nga maglisod sa pag gamit og internet.

Sa laing bahin, nakadawat og 20 ka mountain bike ang indigent nga kabataan nga maglisod sa transportasyon paingon sa tunghaan.

Ang nihatag niini mao ang grupo sa JCI Zugbuana pinangulohan ni Cebu City Sk Federation Jessica Resch. — /MEL (BANAT NEWS)