Amnestiya sa na impound nga mga sakyanan kutob ra sa Oktubre

CEBU, Philippines —  Padayon karon nga giawhag sa buhatan sa Traffic Enforcement Agency of Mandaue kun (TEAM) ang mga tag-iya sa na-impound nga mga sakyanan sa pagpahimulos sa amnestiya nga gitanyag sa siyudad.

Sa nasayran mihatag og amnestiya ang siyudad sa Mandaue sa balayranan sa pag-impound sa sakyanan o ang storage fee.

Gikan sa P500 matag adlaw nga bayranan miabot na lang kini og P1,000.00 ang kinatibuk-an nga mabayran sugod sa pagsulod sa impounding area sa tuig 2020 hangtud sa tuig 2022.

Gisugdan kini sa pagpatuman human giaprobahan sa konseho ang ordinansa nga gipangamahanan ni Konsehal Jimmy Lumapas, chairman sa Committee on Transportation sa konseho sa maong dakbayan. Si Konsehal Lumapas miingon nga nakahukom sila sa paghatag og amnestiya sa storage fee sa mga na-impound nga sakyanan aron pagdasig sa mga tag-iya sa pagkuha na sa sa ilang mga sakyanan nga na-impound.  

Nasayran daghan na sa mga motorcycle ang nalukat na sa mga tag-iya niini sukad gisugdan ang pagpatuman sa amnestiya niadtong Agosto 1, 2023.

Si Hyll Retuya nga maoy TEAM Legal ug Admin Head miingon nga ang amnesty program ilang gisugdan sa pagpatuman sa Agosto 1, 2023 ug hangtud lamang kini sa Oktubre 31 ning tuiga. Dugang pa ni Retuya ang mga tag-iya sa sakyanan nga nasulod sa  impounding area sukad niadtong Enero tuig 2020 hangtud sa Disyembre 2022 ilang mabayran ang P1,000.00.

Apan wala malakip niini ang bayranan sa kalapasan sa balaud sa trapiko. (BANAT NEWS)