“Kawatan” nga natagak sa trak nadakpan, miangkon sab nga siya gigabaan

CEBU, Philippines — Nadakpan sa buy-bust operation sa Pari-an Police Station 1 ang lalake nga nag-viral sa social media human nakuhaan og video nga nanguha og usa ka sakong bugas sa truck nga naghunong diha sa Pier 3 apan natagak ug nabalian og bukton.

Ang nadakpan mao si Gerald Simbajon, alyas Ago, 33 anyos, diin nakuhaan kini og upat ka gramong gituohang shabu nga mobalor og dul-an sa P28,000.

Matud ni Police Major Henry Orbiso, Hepe sa Pari-an Police Station 1 nga dunay mipadangat sa ilaha og report labot sa ilegal nga kalihukan sa dinakpan.

Nahibaw-an sa kapulisan nga ang maong lalake mao ang naa sa viral video sanglit giangkon sab kini sa dinakpan. Matud pa niini, nahitabo ang moang insidente niadtong Lunes, Agosto 7, 2023, alas-9 sa buntag.

Kalisod sa kinabuhi maoy matud pa nagtukmod ni Simbajon nga himoon ang maong krimen. Nisaka siya sa trak nga naghunong samtang nagpaabot sa go signal aron makakuha og usa ka sakong bugas.

Dugang ni Simbajon pag-alsa niya sa bugas nidagan ang truck hinungdan nga na slide siya ug natagak, nawagtangan siya makadiyot sa panimuot apan nakabarog siya og niikyas, nabilin ang usa ka sakong bugas.  Matud pa niya nabali ang iyang bukton apan iyaha rang gibitad aron maulian.

“Katulo na nako, akong gamiton bayad sa utang, kunsumo, P1,500 baligya sa lagyo, kanang naay mopalit,” pag-angkon pa ni Simbajon.

Giangkon ni Simbajon nga gaba ang nahitabo niya ug mipasalig nga dili na siya mousab kun makagawas sa prisuhan.

Samtang matod niya nga mogamit siya og shabu kay tambal kini sa iyang hubak kun dili madala og tambal nga gipabaligya sa pharmacy. —/IBM (BANAT NEWS)