Nagpapolis-polis nangembargo’g lisensiya gidakop
CEBU, Philippines — Nadakpan sa kapulisan sa Dauis Municipal Police Station sa Probinsiya sa Bohol ang usa ka 41 anyos nga lalake nga matod pa nagpapulis-pulis.
Ang gireklamo usa ka Efren Torregosa, residente sa Calceta Street, Cogon District, Tagbilaran City.
Sa report sa Dauis Municipal Police Station nga alas 9 sa buntag sa Agosto 6, 2023 nakadawat sila og tawag sa usa ka concerned citizen nga usa ka lalake nga nagsul-ob og uniporme sa PNP ang nag-inspect ug nangompiskar og lisensiya sa mga motorista pinaagi sa pagpahigayon og Oplan Sita sa Barangay Marivilles, Lungsod sa Dauis sa Bohol.
Matud pa sa nanawag sa kapulisan nga ang nangompiskar og lisensiya gidudahan nilang dili gyud polis. Tungod niini gisusi sa mga polis ang nahisgutang report.
Apan pagka alas 2:30 sa samang petsa samtang gipangita sa kapulisan ang gireklamo, duna na say laing reklamante nga midangop sa ilang buhatan og parehas sab og reklamo.
Wala damha nga ang bag-ong naabot nga reklamante, mao sab ang makasigpat sa suspek diha mismo sa atubangang bahin sa police station.
Namay-ongan dayon niya kini nga mao ang tawong nanakop ug nangompiskar og driver’s license hinungdan nga gipahibalo dayon niya ang mga polis nga niresulta sa pagdakop niini.
Giklaro sa kapulisan nga dili miyembro sa PNP ang dinakpan. Si Torregosa pasakaan og kasong kalapasan sa Section 1, Article 177 kin Usurpation of Authority. IBM (BANATNEWS)
- Latest
