P11.8 milyon Brgy Hall sa Olango gi-inagurahan
CEBU, Philippines — Gipaabot nga makabaton na unya og nindot nga serbisyo ang mga residente sa Barangay Caw-oy sa Olango Island, Lapu-Lapu City nonot sa pag-inagurar sa ilang bag-ong barangay hall nga migasto og P11. 8 million.
Si Lapu-Lapu City mayor Junard Ahong Chan maoy mitunol sa symbolic key sa color light green ug fully-furnished barangay hall ngadto kang Caw-oy barangay captain Rolando Apa Amorin, atol sa inagurasyon nga gitambongan sa mga barangay officials.
“Nakabaton na gyud og nindot, ug presentable nga barangay hall, mao ni ang pangandoy sa tanang taga Caw-oy," suma pa ni mayor Chan.
Si Caw-oy Barangay Councilor Myrna Barong, chairperson sa finance committee, miingon nga ang balor sa yuta miabot og P1.8 million, samtang ang duha ka andana nga building mibalor og P7.082 million, ug laing P1.5 million ang gasto sa interior.
Gipahibawo usab ni mayor Chan nga dunay plano alang sa pagbutang og pantalan alang sa mga pumpboats sa maong dapit.
“Tungod sa inyong suporta, inyo mi nga gipadaog, ang tanan konsehal, ang bise mayor, ang kongresista wala nay babag, pulos na kaabag," suma pa sa mayor.
Samtang si City Councilor Annabeth Cuizon, kinsa maoy nag-representar ni Lapu-Lapu City Lone District Representative Cindi King mipahibawo nga ang City Hospital sa Sta. Rosa diha sa Olango Island ang motanyag usab og libreng eye surgeries sa mga naay problema sa cataracts. — Gikan sa The Freeman, MEL (BANATNEWS)
- Latest
