Taksi drayber nagdudang si  Rhea Mae iyang pasahero

CEBU, Philippines —  Mipatim-aw sa usa ka FM radio station sa siyudad sa Sugbo ang usa ka taxi driver ug misaysay nga niadtong Hulyo 17, 2023, Lunes diha sa may dalan B. Rodriguez dunay nisakay kaniya nga nagdala og dako nga karton nga wala’y sulod apan gipilo ang tabon sa ibabaw nga bahin.

Tulo ka buok ang iyahang pasahero, usa ka lalake nga matod pa Hapon tungod kay nakadungog siya sa inistoryahan niini ug duha ka babaye. Ang gamay nga babaye nag-mask, nagkawo, ug nag-jacket pulos itom samtang ang laing babaye nga nagdala sa karton nagsul-ob og shorts nga puti ug yellow nga sinina, blonde ang buhok ug nagtuyok matud pa ang patik sa paa.

Sa compartment nalang sa taxi gibutang ang karton kay dili maigo sa sulod sa taxi.  Niingon matod pa ang babaye nga nagdala sa karton nga nga adto ra sila magpahatod sa usa ka condominium diha sa may El Salvador Extension, Barangay Labangon, ning siyudad.

Matud pa nanganaog ang iyang mga sakay sa Casa Mira. Sumala pa niya nga naglisod ang babaye sa pagkuha sa karton gikan sa compartment ug nabutang sa iyang hunahuna kun unsay gamitan niini.

Pagkahapon sa Hulyo 17 nakadungog nalang kini og balita nga dunay babaye nga giputos og habol, gisulod og karton, gipatay ug gilabay sa Sitio Mohon 1, Barangay Tisa.

Sa iyang huna-huna basin og usa sa mga misakay niya anang pagka buntag ang napalgang patay  sa maong lugar.

Si Rhea Mae Tocmo, gipatay, giputos og habol, gisulod og karton ug gilabay daplin sa karsad sa Sitio Mohon 1, Barangay Tisa niadtong Hulyo 17, 2023 sa hapon.

Gipatan-aw ang maong taxi driver sa picture ni Rhea Mae Tocmo uban ang pipila ka mga kuyog niini ug usa sa mga naa sa picture nga dunay patik ang nagdala sa karton dihang misakay sa iyang taxi.

“Mao na, nagbakos man iyang patik  sa wala, nagtuyok ni sa iyang paa,” dugang sa taxi driver. Si Police Lietuenant Colonel Janette Rafter, Deputy City Director for Operations sa Cebu City Police Office mimando sa Labangon Police Station 10 nga makig-alayon sa maong taxi driver basin og makatabang kini sa imbestigasyon.  Giklaro ni Rafter nga dili makaapektar sa ilang imbestigasyon kanila ni Simeon Gabutero ug Roberto Gabison ang maong kalamboan kay nagpadayon pa man sila sa pagkuha og mga kasayuran bahin sa kaso.

Subayon sa kapulisan ang mga kuha sa CCTV camera sa condo nga gikanaogan sa mga pasahero sa maong taxi driver. (BANAT NEWS)