Giingong pagpanagit og mga minor sa Lapu-Lapu gisusi na

CEBU, Philippines — Nagpadayon sa ilang gihimong pakisusi ang kapolisan sa Lapu-Lapu City Police Office (LCPO) sa gikatahong panghitabo sa pagpanagit og mga minor de edad nga babaye.

Si Police Major Dexter Basirgo, hepe sa Presinto 5 sa LCP0 miingon nga gialigar sa 18 anyos nga biktima nga ang pagdagit kaniya nahitabo sa sitio Matumbo sa Barangay Pusok niadtong Hulyo 27, 2023 sa gabii.

Ang giingong biktima naglakaw sa dapit dihang giduol sa babaye ug lalaki dayong sampong og panyo sa iyang ilong ug baba nga maoy hinungdan nga nawad-an siya sa maayong panimuot.

Nahibalik ang iyang maayong panimuot diha sa Talamban sa Siyudad sa Sugbo ug nakahigayon kini sa pag eskapo.

Dugang pa ni Basirgo nga sa footage sa CCTV ilang nakita nga naglakaw ang biktima sa Marcelo Fernan Bridge padulong na pauli sa Siyudad sa Lapu-Lapu.

Samtang si Police Lieutenant Colonel Christian Torres miingon nga ang laing gikataho nga gidagit mao ang upat ka mga biktima nga mga minor de edad nga giingong gikumbinsir kini nga himoong model.

Segun sa report gidala kini sa usa ka lalaki ug babaye sa giabangan niining boarding house sa barangay Pusok ug maoy ilang nakita ang mga kuryente, bara ug pala nga maoy hinungdan sa ilang kalisang ug naglumba sa pagpanagan. MEL (BANATNEWS)