Bag-ong birthing center  sa Danao giinagurahan

CEBU, Philippines —  Ang bag-ong Birthing Center sa siyudad sa Danao hingpit na nga giinagurahan sa mga lokal nga opisyal sa dakbayan.

Ang Danao City Health Services Office (CHSO) uban ni Mayor Mix Durano ug mga bisita ang nagkuyog sa inagurasyon sa maong pasilidad niadtong Hulyo 28.

Apil sa mga serbisyo nga mamahimong mapahimuslan sa mga mabdos o inahan sa maong birthing center mao ang normal nga delivery kun pagpanganak; STI ug HIV screening; family planning services apil na ang paghatag og libre nga condom, post-partum IUD ug progestin subdermal implant (PSI)

Ang maong birthing center gigastohan og P5million samtang P2 million usab ang state-of-the-art equipment kun mga bag-o nga kagamitan niini.

Ang pundo gikuha gikan sa Health Facility Enhancement Program (HFEP) sa Department of Health (DOH) Central Visayas Center for Health Development 7.

Wala pa hinoon gibutyag kon kanus-a ang hingpit nga pag-abli sa maong pasilidad. (BANAT NEWS)