Usa patay, duha angol sa aksidente sa kadalanan sa Lapu-Lapu ug Badian

CEBU, Philippines — Patay ang usa ka lalaki human nibangga ang iyang gimanehong motorsiko ngadto sa usa ka van diha sa M.L Quezon national highway, Barangay Ibo, Dakbayan sa Lapu-Lapu niadtong Miyerkules sa gabii.  Ang namatay giila nga si Junel Abing, hingkod ang panuigon, residente sa Bag-ong Silangan, Barangay Mactan, sa maong siyudad ug drayber sa Yamaha Mio nga motorsiklo.

Samtang ang drayber sa Toyota Hi-Ace Commuter mao si Agustin Aguilar Olivirio, 45, residente sa Abuno, Barangay Pajac, Dakbayan sa Lapu-Lapu.

Base sa imbestigasyon sa Traffic Enforcement Unit sa Lapu-Lapu City Police Office nga ang drayber sa van padulong sa Barangay Pusok samtang si Abing gikan sa Barangay Pusok padulong sa Barangay Ibo kinsa kalit lang nitipas paingon sa pikas lane ug nilahos kini ngadto sa van.

Si Abing kinsa nalagpot ug nabunal diha sa karsada ang daling gidala ngadto sa Lapu-Lapu City District Hospital apan gideklara kini sa doktor nga patay na nga naabot sa maong tambalanan.

Sa laing bahin, tulo ang naangol sa nahitabong aksidente sa kadalanan diha sa Barangay Alowijao, Lungsod sa Badian kagahapon sa kadlawon.

Ang mga naangol mao sila si John Allen Gillana Sario, 18-anyos, ulitawo drayber sa Yahamaha nga motorsiklo ug ang iyahang mga sakay nga si Alex Vilocura Tungcab, 18, ulitawo, pulos taga Barangay sa maong lungsod. Samtang ang laing naangol nga nagmaneho sa Suzuki FV110LE nga motorsiklo mao si Hobert Dacillo Agravante, 27, ulitawo, taga Barangay Banhigan sa maong lungsod.

Giingong kalit lang nisulod ang motorsiklo ni Agravante sa linya nga giagian nila ni Sario ug Tungcab nga hinungdan sa panagbangga. —Paolo Anton Nabaja, Romeo D. Marantal (BANAT NEWS)