Duha patay sa aksidente sa motor
CEBU, Philippines — Duha ka managlahing panagbangga sa motorsiklo ug vans ang mikalas og duha ka kinabuhi sa lungsod sa Compostela ug sa siyudad sa Danao niadtong adlaw'ng Domingo ug Sabado.
Nakalas ang drayber sa Honda Beat nga motorsiklo human kini nabangga sa kasugat niining usa ka van diha sa Purok Nangka, Brgy. Estaca Compostela niadtong Domingo sa alas 4 sa kaadlawon.
Giila ang biktima nga si John Michael Agipo, residente sa Tayud, Liloan samtang ang drayber sa nakabangga nga Toyota Hi-Ace Tourist van mao si Rogelio Layos Noynay, 44, nagpuyo sa Tindog, Medellin.
Base sa gihimong imbestigasyon sa Compostela Police Station, nagbiyahe ang biktima paingon sa amihanang direksyon samtang ang van nagbiyahe paingon sa habagatan. Pagabot sa maong dapit gikatahong nagbanggaanay ang duha nga miresulta sa pagkalamba sa biktima sa sementadong dalan.
Daling gidala si Agipo sa Danao Provincial Hospital apan gideklarar nga patay na sa nag-atiman nga mananambal samtang boluntaryong mitahan ang draybe r sa maong estasyonan.
Lain sab ang namatay sa panagbangga sa motorsiklo ug van diha sa National Road, sa Brgy. Taytay sa Danao City niadtong Sabado sa gabii.
Giila ang nakalas nga drayber sa Yamaha motorcycle nga si Almer Jon Marikit Manco, 18, residente sa Purok 4 Tuburan, Danao City samtang ang drayber sa Mitsubishi van nga nakadasmag kaniya mao si Reynaldo Cangmaong Castro, 56, nagpuyo sa Natimao-an, Carmen.
Sa inisyal nga imbestigasyon sa Danao City Police Station, ang biktima paingon sa habagatan nga direksyon dihang aksidente kining nadumbolan sa nagsunod nga van.
Tungod sa kakusog sa pagdumbol nalabay sa karsada ang biktima nga maoy hinungdan sa grabe niining pagkaangol. Gidala sa tambalanan ang biktima apan nakabsan kini sa kinabuhi.
Si Castro nga mitahan sa kapolisan human sa maong insidente.
Karong adlawa gikatakdang pasakaan og kasong reckless imprudence resulting to homicide ang mga nalambigit nga drayber , Romeo Marantal ug Jhayrei Pintac CNU Intern/IBM (BANAT NEWS)
- Latest
