Gasolinahan gidaro sa SUV

CEBU, Philippines —  Gidaro sa usa ka SUV ang cashier’s booth sa usa ka gasolinahan diha sa Trancentral Highway sa Barangay Busay, Cebu City niadtong Sabado sa kaadlawon nga niresulta sa pagkaangol sa pumpboy ug sa drayber nga nakadasmag.

Ang babaye nga gamaneho sa Hyundai Tucson giilang si Jossel Cayawan Wild, 42-anyos, ug residente sa 10D, Tower 2, City Lights Garden, Lahug, Cebu City.

Samtang nalandig sa tambalanan ang iyahang sakay nga si Rosie Caburnay, 60, residente sa maong barangay ug ang pumpboy nga si Georgy Mahusay, 28, taga Sitio Tanguili, Busay.

Matud pa sa imbestigasyon ni Police Executive Master Sgt. Brent Fulmaran sa PCP3 Malubog Police Station gikan sa silangan paingon sa kasadpang direksyon ang SUV.

Nawad-an og kontrol sa manobela si Wild ug nalahos og bangga sa cashier booth sa maong gasolinahan. Ang pumpboy nga nagbarog  sa maong booth napunggit sa naghaguros nga sakyanan.

Daling gidala sa Cebu City Medical Center ang mga naangol samtang gikostudiya sa kapolisan si Wild.

Samtang nalandig sa tambalanan ang usa ka inahan apil ang 8 anyos nga anak niini ug 21 anyos nga paryente sa dihang gidaro sa mini dumptruck ang motorsiklo nga ilang gisakyan diha sa National Highway, Barangay Cantuod, Lungsod sa Balamban niadtong Biyernes sa buntag.

Ang mga naagol mao sila si Jonesa Cereño Sorela, 32, maoy nag-maneho sa motorsiklo, backride niini nga sila si Princess Lee Cereño Sorela ug Anilyn Garcia Sorela pulos molupyo sa Sitio Immaculada, Barangay Nangka, Lungsod sa Balamban.

Samtang ang driver sa Isuzu Elf mini-dump truck gimaneho ni Dionesio Hermino Alinghawa Jr., 28, taga Barangay Sing-sing sa naasoy nga lungsod.

Sa imbestigasyon sa Balamban Municipal Police Station pinangulohan ni Police Lt. Col. Glenn Hife  base sa imbestigasyon nibasiyo ang brakes sa maong mini dumptruck nga gikan pa sa habagatan padung sa amihanan.

Gilubag unta sa drayber padung sa pikas lane ang trak apan napunggit hinuong ang motorsiklo sa mga biktima. -   report nilang Jhayrei Pintac, Dannahli Pogado, CNU Interns/IBM (BANAT NEWS)