Sim nga wa irehistro i-deactivate sa Hulyo 26
CEBU, Philippines — Sugdan na sa gobiyerno ang pag deactivate sa mga mobile numbers nga wala pa magparehistro sa Pilipinas karong umaabot nga Hulyo 26, 2023.
Una nang gihatag isip deadline sa sim registration ang Abril 26, 2023 apan gisibog kini tungod kay gihangyo sa mga telco nga lugwayan kni kay dunay mga lugar nga hinay nga signal.
Si Department of Information and Communication Technology (DICT) Secretary Ivan John Uy mipahibalo nga wala na gyuy extension niini.
“No extensions because July 25 is a hard deadline. Those who have yet to register by 12:01 am of July 26, they will no longer be able to access connectivity services,” matud pa ni Secretary Uy niadtong Biyernes, Hulyo 21, 2023.
Kadtong di makaparehistro sa ilang mga sim cards maputlan og mobile service, di na sila makatawag, data ug text gamit ilang mga numero.
Kung ang SIM wala pa ma-register ug na deactivated na, ang tag-iya niini hatagan og laing lima ka adlaw alang sa pag-reactivate niini pinaagi sa pagparehistro ug kung dili ang telco na mismo ang moputol sa linya niini.
Niadtong Abril, gibutyag sa National Telecommunications Commissions pinaagi sa Philippine Information Agency nga 74, 182, 402 na ang nakaparehistro sa ilang SIM cards.
“We are already there and those who have yet to register are either hardheaded people or really involved in scams,” dugang pa ni Uy.
Ang pagparehistro sa sim cards gimando ubos sa Republic Act 11934, o ang SIM Registration Act diin nagmando kini sa tanang konsyumer nga iparehistro ilang SIM alang sa ilang seguridad ug sa tanan.- CNU Intern
- Latest
