Pagpatay sa may atrasong pushers nasanta

CEBU, Philippines — Napugngan sa kapulisan sa Dakbayan sa Sugbo ang usa ka gun-for-hire  nga duna untay pamatyon diha sa Barangay Suba ug Pardo human kini nadakpan sa buy-bust operation.

Ang Drug Enforce Unit sa Sawang Calero Police Station 6 mihimo og operasyon niadtong Miyerkules sa gabii diha sa Block 7, Barangay Sawang Calero ning siyudad.

Nadakpan ang usa ka Jake Merson Rafols Mercado alyas “Kano”, 33, nagpuyo sa Block 5 sa naasoy nga barangay ug usa ka high value individual. Nakuha gikan niya ang 1.115 kilograms nga gituohang shabu nga mobalor og P7.5 milyones.

Gibutyag ni Cebu City Police Office Director Colonel Ireneo Dalogdog nga si Mercado hitman sab sa mga druglords.

“In fact, kagabii (Miyerkules) during the tactical interrogation conducted by the operating unit gi-divulged niya nga siya naa siya’y duha ka personalities nga dapat itumba pero unfortunately nadakpan siya, so, wala na niya mahimo,” sigon ni Dalogdog.

Matud ni Dalogdog ang mga agalon ni Mercado druglords nga nangapriso sa prisohan sa Abuyog, Leyte ug sa Cebu City Jail Male Dormitory (CCJMD).

Niadtong Hulyo 16, gikatahong gipusil ni Mercado ang kanhi niya kauban sa CCJMD kay namago kini sa transaksiyon sa illegal nga drugas, swerte lang nga sa bukton ra kini naigo ug nakaikyas.

“Involved sa illegal drugs unya kadto pud naa ni sila’y bossing sa taas nga mao puy mosugo sa ilaha nga kini siya maoy dapat patyon para in return naay monetary nga ibayad sa ilaha…Naay ihatag sa ilaha P30,000,” ni Dalogdog pa.

Gibutyag ni Dalogdog nga nadakpan si Mercado niadtong 2015 tungod sa ilegal nga drugas ug pagpangawat. Nakagawas sa prisohan tuig 2018 tungod sa probation.

Apan tuig 2020 nadakpan na sab kini  tungod sa illegal nga drugas apan nakagawas human nakapiyansa.

Apan nibalik kini sa illegal nga kalihukan ug nadakpan pagusab niadtong tuig 2021 sa Sawang Calero Police Station, buwan sa Mayo ning tuiga nakagawas kay naka plea bargain.

Sa pikas bahin, nadakpan sa mga sakop sa Pari-an Police Station ang usa ka 18-anyos nga lalaki ug menor de edad nga gituohang gunman ug durugista sa managlahing buy-bust operations niadtong Hulyo 19-20, 2023.

Ang nasikop nga 18 anyos giila nga si Michael Angelo Pareja Catipay Jr. alyas “Gelo” taga Sityo Upper Riverside, Barangay. Hipodromo, dakbayan sa Sugbo.

Si Police Major Henry  Orbiso , Station Commander sa Pari-an Police Station 1, maoy nangulo sa pagsikop kang Catipay diha sa Sitio BSJCO, Brgy. T. Padilla diin kini nakuhaan og 15 gramong gituohang shabu.

Nakuhaan usab ang suspek og armas usa ka  Armscor caliber .9mm pistol nga adunay serial number 1538075, usa ka  magazine, ug lima ka .9mm nga bala.

Base sa impormasyon nga gihatag ni Dalogdog, ang dinakpan maoy suspek sa pagpamusil niadtong Disyembre 2022 sa Brgy. Pari-an, nagatubang kini og kasong murder ug two counts frustrated murder.

Nadakpan sab ang 17-anyos nga lalaki sa Sitio Riverside, Brgy. Lorega San Miguel. Ang menor de edad usa ka high school graduate nga residente sa Sitio Malinaw, Brgy. Carreta nakuhaan og 10 gramong gituhoang shabu, usa kalibre .357 revolver nga walay serial number ug dunay upat ka bala.

Ang mga dinakpan pangkasohan og paglapas sa Sec. 5 ug 11, Artikulo II sa R.A. 9165 ug R.A 10591 (Comprehensive Firearms and Ammunition Regulation Act). — Romeo D. Marantal ug reports nilang Paolo Anton Nabaja, UV Intern, Dannahli Pogado, CNU Interns/IBM (BANAT NEWS)