DSWD nipagawas og P2.1 milyones nga ayuda alang sa nasunogan

CEBU, Philippines — Giapod-apod niadtong Huwebes Hulyo 13, 2023 sa mga sakop sa Department of Social Welfare and Development (DSWD) Field Office 7 ang mokabat sa P 2.1 milyones nga Emergency Cash Transfer (ECT) assistance ngadto sa 113-ka households nga apektado sa sunog.

Ang 113-ka households nga apektado sa sunog naglangkob sa tulo ka barangay nga mao ang Barangay Mambaling diin 55 ka households ang natabangan, 48 usab ang gikan sa Barangay Subangdaku ug 10 ang anaa sa Barangay Guadalupe.

Kini nga mga barangay gipaubos sa state of calamity pinaagi sa usa ka resolusyon nga gikonsiderar ang gidak-on ug epekto sa kadaot gumikan sa sunog.

Ang gihatag nga kantidad sa matag pamilya gitino pinaagi sa klasipikasyon sa kadaot sa balay diin kadtong gideklarar nga totally damaged makadawat og 75% sa regional wage rate nga P 326.00 sulod sa 62 ka adlaw, ug kadtong na deklarar nga partially damaged makadawat ra gihapon sa samang kantidad apan alang lamang sa 31 ka adlaw.

Ang assistance nga ni balor og P2,203, 108.00 gibahin ngadto sa 95 households kansang mga balay gideklarar nga totally damage.

Gawas niini, daan nang naghatag og P2 million cash assistance and ECT, DSWD- 7 pinaagi sa Assistance to Individuals in Crisis Situation program ug lain 881,000 nga food and non-food item alang sa mga apektadong pamilya.

Ang DSWD 7 mihatag sa ECT nunot sa hangyo ni Cebu City South District Congressman Eduardo R. Rama sa pakigtambayayong sa lokal nga kagamhanan sa dakbayan sa Sugbo. — CNU Intern/MEL (BANAT NEWS)