‘Turko’ naningil sa utang, gitabangag kulata
CEBU, Philippines — Nabun-og ang usa ka Indian National dihang gikulata samtang kini nangingil sa iyang mga gipautang niadtong Sabado, Hulyo 15, 2023 diha sa Sitio Kahuyan, Barangay Mambaling sa Dakbayan sa Sugbo.
Giila ang biktima nga si Balsit Singh, negosyante ug money collector (lending) nga taga Kimba sa Dakbayan sa Talisay.
Samtang gidemalas hinuon ang duha nga matud pa nagtinabangay pagkulata kaniya kay sila nadakpan ug giila nga silang Fedelito Tabernero Luchavez, 54, ug si Fritch Gerald Luchavez Matsumoto, 33, pulos taga Sitio Huyong-Huyong, Brgy. Mambaling sa Dakbayan sa Sugbo.
Ang kapulisan sa Mambaling Police Station nga sila PSSG. Sundy Flores, PSSG. Mark Anthony Dela Victoria, PSSG Junrel Dubun ug si Patrolman Felmar Gomez dali nga niresponde sa nadawat nga alarma ug dihadiha nga nasikop ang mga suspek.
Nasuta sa kapulisan nga ang biktima niadto sa nahisgutang lugar aron maningil unta sa iyaan sa usa ka suspestado.
Apan miresulta kini sa panaglalis apan ang pag-umangkon sa nangutang nga si Gerald gikatahong niduol sa biktima ug gisumbag kini sa wala nga mata nga miresulta sa pagka black eye niini.
Didto na niulbo ang kagubot kay miapil na og kulata sa biktima ang mga kabanay ug mga silingan sa mga dinakpan.
Apan base sa pamahayag sa usa sa mga suspek, giingong gisagpa sa biktima ang asawa sa suspek nga si Fedelito) atol sa panaglalis mao nga niulbo ang kagubot ug ilang nakulatahan ang biktima. Ang biktima miingon nga atol sa kagubot nawala ang ilang P20 mil nga koleksyon hasta iyang singsing.
Ang mga suspetsado gitanggong karon sa Mambaling Police Station arun pasaakaan og kaso nga physical injury. - Romeo Marantal (BANAT NEWS)
- Latest
