Maestra, kabit nasakpan sa bana

CEBU, Philippines — Nagtingkagol karon sa selda ang usa ka magtutudlo sa elementarya ug ang matud pa kabit niini human silang duha gipadakop sa iyang bana sa dihang sila naaktuhan sa sulod sa usa ka  lawak sa usa ka Inn sa Barangay Poblacion sa Lungsod sa Compostela niadtong Sabado sa hapon, Hulyo 15,2023.

Ang gidakop kapolisan sa Compostela magtutudlo sa Grade 1 sa pangpublikong tunghaan  samtang ang lalaki, mekaniko, ang Banat News nitago sa mga pangalan sa duha aron proteksyonan ang ilang mga pamilya.

Matud pa sa bana sa pakighinabi sa Banat News dugay na siya nakamatikod nga iyang asawa adunay ka chat diha sa cellphone nga laing lalaki.

Ug kagahapon petsa 15 Hulyo 2023, iyaha kining gisundan padung sa Dakbayan sa Sugbo kay adunay gitambongan nga kasal ug wala magdugay  nakita niya kini nga nigawas sa hotel diin gihimo ang kasal ug nagpahatud sa terminal.

Matud pa sa bana nga iyang asawa misakay og laing sakyanan paingon sa Compostela hinungdan nga iya kining gisundan kung asa paingon.

Pagabot sa Barangay Poblacion sa maong lungsod nanaog  ug duna lalaking nisugat niini u gang duha nanulod sa maong inn.

Diha na misamot ang pagduda sa bana maong miadto kini sa police station ug nagpatabang aron sikupon sa akto ang gibuhat sa iyang kapikas ug sa kabit niini. Inabagan sa mga nagdumala sa maong inn, giadto sa bana ug mga polis ang lawak diin ni-check in ang duha, pugsanon kining giablihan ug sila nasakpan, ang lalaki wala nay pang-ibabaw samtang ang babaye duna pay suot apan wala nay bra.

Diha sa presensya sa mga polis ug sa bana nag-ilis sa tanan nilang sapot ang duha ug gidala sila ngadto sa Compostela Police Station aron imbestigaron.

Apan pagabot didto,  ang maestra kalit lang nikuha og haplas ug dayon giyarok tanan ang sulod niini hinungdan nga siya gitabang ug gidala sa hospital.

Ang duha pasakaan og kasong Adultery ug Concubinage sa bana ug sa kapolisan karong adlawa.— /IBM (BANAT NEWS)