Upat ka suspetsadong durugista sa Mandaue ug Cebu City sikop sa buy-bust
![Upat ka suspetsadong durugista sa Mandaue ug Cebu City sikop sa buy-bust](https://media.philstar.com/photos/2023/07/11/buy-bust-operation_2023-07-11_22-36-25.jpg)
CEBU, Philippines — Nikabat ngadto sa 105 ka gramong shabu nga nagkantidad tanan ngadto sa P714,000.00 ang nasakmit atol sa gipahigayong buy-bust operation sa kapolisan sa Presinto 3 sa Mandaue City Police Office (MCPO) diha sa Baranay Jagobiao, Dakbayan sa Mandaue niadtong Lunes sa gabii.
Si Police Captain Emmanuel Rabaya, hepe sa Presinto 3 sa MCPO niila sa suspetsado nga si Jayson Veloso, 29-anyos, kasamntangang nagpuyo sa Lungsod sa Compostela apan giingong lumad kining molupyo sa Naval, Biliran, Leyte.
Matud ni Rabaya nga nakadawat sila og report kabahin sa ilegal nga kalihokan sa suspetsado.
Giingong ang suspetsado nihimakak kini sa pasangil batok kaniya ug nangangkon nga gisugo lang kini sa pagdala sa maong ginadiling drugas gikan sa usa ka binilanggo sa Abuyog Penal Colony ug gibayaran siya og P5,000 alang sa pagdala niini sa Siyudad sa Mandaue.
Sa laing bahin, usa ka giingong high value individual (HVI) ang nasikop usab atol sa buy-bust operation sa kapolisan diha sa Sitio Upper Suran, Barangay Kinasang-an, Dakbayan sa Sugbo kagahapon.
Ang suspetsado mao si Jessie Cabusas, 28-anyos, ulitawo, taga Sitio Ubos-Pundok, Barangay Basak Pardo, Siyudad sa Sugbo.
Nasakmit gikan sa suspetsado ang 100.30 gramos nga shabu nga nikantidad tanan ngadto sa P682, 040.
Samtang sa laing operasyon sa kapolisan, nasikop usab sa buy-bust operation ang duha ka street level individual nga si Alejandro Enario Libron, 25, taga Sitio Tabok Canal, Barangay Basak San Nicolas, Siyudad sa Sugbo ug si Ryan Patis Tan, 37,minyo, taga Sitio Ylaya Barangay Talabamban Siyudad sa Sugbo.
Ang Station Drug Enforcement Unit sa kapolisan sa Inayawan ang nipahigayon og buy-bust operation kagahapon sa kadlwon batok sa mga suspetsado.
Ang mga suspetsado nadetiner karon diha sa detention cell sa Inayawan Police Station ug gikatakdang pasakaan og tukmang kaso sa nahimo nilang kalapasan. Paolo Anton Nabaja, UV Intern ug Romeo D. Marantal, BDB (BANATNEWS)
- Latest