Molobolo Spring gipasira; TRA sa Medellin gibuksan na

CEBU, Philippines — Mayor Democrito “Aljun” Diamante sa Lungsod sa Tuburan ang nipasira na usab sa Molobolo Spring human adunay nadisgrasya samtang naligo diha sa maong spring.

Matud ni Diamante nga gibuksan na unta ang Molobolo Spring sa wala pa ang pista sa lungsod niadtong Hunyo 12, 2023 apan niadtong Sabado gisirad-an kini og balik human adunay menor de edad ang nadisgrasya.

Gibutyag ni Diamante nga naputol ang tudlo sa maong menor ug gitabangan niya kini sa galastohan sa tambalanan.

Si Diamante nagkanayon nga adunay mga laing tourism spot ang ilang matanyag gawas sa Molobolo Spring tungod kay ubos pa usab sa litigation ang right of way sa maong dapit nga giingong gipanag-iya og pribado.

Nasayran nga moabot ngadto sa 300 ka tawo ang mobisita sa maong spring sa weekdays ug 1,000 ka tawo sa weekends diin P20 lang ang ilang bayaran pag-anha sa lugar tungod kay pampubliko kini.

Naglaom si Diamante nga wala pay pasko mabuksan na nila og balik ngadto sa publiko ang Molobolo Spring nga fully rehabilitate na.

Sa laing bahin, hingpit na nga gibuksan ang Tourist Rest Area sa Lungsod sa Medellin kagahapon kinsa si Tourism Secretary Christina Garcia Frasco ang nitambo sa maong kalihokan lakip sa mga nitambong ang mga bokal, mayor sa probinsiya ug dakbayan sa Sugbo, mga magpapatigayon, stakeholders ug opisyales sa lungsod nga gipangulohan ni Mayor Joven Mondigo, Jr.

Ang TRA sa Lungsod sa Medellin usa lang kini sa napulo ka TRA nga giinugarahan sa Department of Tourism ug TIEZA nga partner niini.

Nasayran nga ang Sugbo adunay upat ka TRA nga buksan nga naglangkub sa Carcar, Moalboal, Carmen ug ang medellin nga abli na.

Ang TRA dili lang kini adunay limpiyo nga pansayan alang sa mga turista, apil na usab ang coffee shop, charging stations, ug pasalubong center.

Samatang si Gobernador Gwendolyn Garcia mapasalamaton sa suporta nga gihatag sa DOT ngadto sa probinsiya ug sa mga mayor, opisyales sa kalungsuran ug dakbayan ilabi na sa mga magpapatigayon ug stakeholders sa ilang gipakita nga suporta ngadto kang Frasco human kini gibatikos sa nilabay’ng semana. (BANAT NEWS)