Amahan giunay og tigbas sa anak
CEBU, Philippines — Gitigbas sa usa ka anak ang kaugalingon niining amahan diha sa ilahang panimalay sa Sitio Kulti Barangay Obong, Lungsod sa Dalaguete kagahapon sa buntag.
Ang biktima giila sa kapolisan nga si Jose Amacna Hontiveros, 70-anyos, residente sa nahisgutang lugar.
Ang suspetsado ang anak niini nga si Jennifer Maglinte Hontiveros, 36-anyos, residente usab sa maong lugar.
Base sa imbestigasyon sa kapolisan sa wala pa mahitabo ang insidente ang amahan ug anak diha sulod sa ilang balay nagkalalis kini.
Taliwala sa ilang panaglalis ang suspetsado nihulbot kini og sundang ug deretsong tigbas ngadto sa iyahang amahan.
Giingong gusto sa suspetsado nga patyon ang iyahang amahan.
Ang biktima kinsa natabas ang nawong ug nakaangkon usab og laing mga samad tinigbasan sa ubang parti sa iyang lawas daling gidala diha sa Argao District Hospital samtang ang suspetsado anaa karon sa kustodiya sa kapolisan.
Matud ni Police Senior Master Sergeant Job Joseph Fajardo, desk officer sa Dalaguete Police Station nga giingong ang suspetsado medyo adunay deperensiya sa pangisip ug aduna kini tulomanon nga gihimo.
“Mura ma’g naay gamay deperensiya koan sa pangisip kiring anak gumikan aning gahum-gahum naay tulomanon ba”, matud ni Fajardo.
Ang suspetsado gikatakdang pasakaan og kasong frustrated parricide. — Romeo D. Marantal/BDB (BANAT NEWS)
- Latest
