Tulisan nga drug pusher nadakpan
CEBU, Philippines — Gidudahang tulisan ug durugista nadakpan sa buy bust operation sa kapolisan diha sa Sitio Lahing-Lahing 1, Barangay Mabolo Cebu City sa niaging gabii.
Giila ang suspek nga si Reymart Badiu Sayson alyas “Mamart,” 19, nagpuyo sa maong lugar, nasakmit gikan niya ang mga pinutos nga gituohang shabu, armas nga .38 caliber revolver nga dunay mga bala.
Ang operasyon gipangulohan ni Police Major Eraño Regidor sa Mabolo Police Station inubanan sa Philippine Drug Enforcement Agency (PDEA).
Si Regidor miingon nga ang suspek anaa sa lista sa Oplan Run After Perpetrators (ORAP) ug makadaghan ng gireklamong magsige og pabuto og armas sa maong dapit ug nalambigit sab sa pagpamusil sa maong dapit batok sa laing badlungon sa maong lugar.
Dugang pa ni Regidor, suspek sab kini sa mga pagpanulis diha sa Chinese Cemetery. Kasong kalapasan sa Section 5 and 11 Article II of Republic Act 9165 (Buy-bust) ug R.A 10591 (Comprehensive Firearms and Ammunition Regulation Act) ang ipasaka batok sa suspek.
Sa pikas bahin, duha ka idlas nga durugista ang nasikop sa City Drug Enforcement Unit (CDEU) sa Bogo City Police Station niadtong Martes sa kaadlawon, sa Sitio Onyx, Brgy. Bungtod sa maong siyudad.
Ang mga suspetsado mao sila Jason Nonong Lepasana, 48, anaa sa drug watchlist, ug si Eden Ancot Lepon, 45, mga residente sa Brgy. Gairan sa maong siyudad. Ang duha parehong nakuhaan og pinakenteng gituohang shabu, kwarta nga P1,000, sling bag ug Honda Wave nga motorsiklo nga walay plaka ug cellphones.— Paolo Anton Nabaja, Jhayrei Pintac, Dannahli Pogado, CNU Interns ug Romeo Marantal, IBM (BANATNEWS)
- Latest
