Kapolisan adunay na-monitor nga private armed group sa Negros Oriental

CEBU, Philippines —  Ang Negros Oriental Provincial Police Office nga sakop sa Police Regional Police Office-7 adunay na-monitor nga private armed group matud ni Police Lieutenant Colonel Gerard Ace Pelare, tigpamaba ni Brigadier General Anthony Aberin, direktor sa PRO-7.

Matud ni Pelare nga ang kapolisan nipahigayon na og imbestigasyon kabahin niini diin pipila ka mga miyembro sa maong private armed group nadakpan na ug ang uban gipangita pa.

Si Pelare nagkanayon nga dili kini organized private armed group gumikan kay human sa insidente sa pagpamusil ngadto sa Lungsod sa Pamplona, Negros Oriental diin sa maong hitabo siyam ang namatay lakip niini si kanhi Gobernador Roel Degamo ang uban nga nalambigit sa pagpamusil nangadakpan ug ang uban nanglayas na sa probinsiya.

Apan matud usab ni Pelare nga dili sila mokompiyansa diin adun sila’y team nga giumol nga maoy nitutok niini.

Gibutyag ni Pelare nga ang private armed group kanektado sa iladong mga tawo.

Sayo pa, adunay public hearing nga gipahigayon ang Commission on Elections (COMELEC)-7 ngadto sa Probinsiya sa Negros Oriental aron pagkuha sa baroganan sa mga Negrense ug stakeholders mahitungod sa postponement sa Barangay ug Sangguniang Kabataan elections sa probinsiya.

“As we have been mentioning since April nag-start na dayon ta sa atong assessment sa area ug sa threat assessment sa mga elected government officials as well as mga potential candidates, we are ready to provide security coverage kong ang resulta magpadayon but kining tanan maghuwat sa declaration sa issuance sa COMELEC”, dugang ni Pelare. – BDB (BANATNEWS)