Playground sa Plaza Indpendencia isunod sa pagpanindot

CEBU, Philippines — Human sa pag-redevelop sa Pasil Children’s Park ug gisubhan niadtong Sabado nagplano karon ang first lady sa Dakbayan sa Sugbo Malou Rama nga isunod usab ang pagpanindot sa playground diha sa Plaza Independencia inabagan sa pribadong mga kompaniya.

Ang first lady nagkanayon nga gusto niya nga makakita og daghang mga bata nga mahatagan og kahigayonan nga malingaw sa ilang pagkabata sa gawas nga adunay nindot nga dulaanan.

Si Malou kinsa commissioner sa Parks and Playground Commission nagkanayon usab kini nga gikinahanglan nila ang tabang sa pribadong sektor ug dili lang magsalig sa pundo sa gobiyerno nga sama sa Pasil/Suba Children’s Park diin nakakuha kini og tabang  gikan sa PhilSeven Foundation Incorporated (7 Eleven),  AS Enriquez Engineering Consultancy ug gikan sa mga higala ni Engineer Apollo Enriquez.

Dako ang kalipay sa first lady nga nakakita sa daghang mga bata diha sa Suba ug Pasil ug ubang mga silingang barangay nga nitungha atol sa opening ug mapailobon nga nagpaabot sa pag-abli sa parke.

Samtang naglibot-libot sa 4,000 metro kwadrado nga luna, si Malou wala makapugong sa pagpadayag sa iyang plano alang usab sa pagpanindot sa playground sa Plaza Independencia.

Gibutyag ni Malou sa Banat News nga tinguha niya nga makabaton og mas dako nga open space nga kaduwaan sa mga bata ug makig-uban sa ubang mga bata.

Ang dapit duol sa playground sa Plaza Independencia mao usab ang dapit nga tukoran unta sa skate park.

Si Mayor Michael Rama atol sa re-opening sa Children’s Park nipadayag usab nga gusto niya og dugang parke ug open spaces alang sa mga bata ug tigulang.

Sa pagkakaron, aduna nay pipila ka pocket parks nga gimugna sa city government aron dili maglabay ang mga lumolupyo sa basura sa hawan nga mga luna diin gamiton kini sa fitness ug relaxation. — Caecent No-ot Magsumbol ug Paolo Anton Nabaja, UV Intern (BANAT NEWS)