Kapin sa 1,000 ka tawo nakalapas sa ordinansa; pusher sikop sa buy-bust

CEBU, Philippines —  Nadakpan sa kapolisan sa Lapu-Lapu City Police Office  (LLCPO)  ang kapin sa 1,000  ka tawo sa gipatuman nga mga lokal nga ordinansa sa kagamhanan sa Siyudad  sa Lapu-Lapu.

Si  Police Colonel Elemer Lim,  director sa kapolisan sa LLCPO nagkanayon nga naglakip sa gipatuman nga mga lokal nga ordinansa mao ang pagdili sa pag-inom og ilimnong makahubog diha sa publikong lugar diin niabot ngadto sa 109 ka tawo nga nakalapas sa maong balaod ang ilang nadakpan.

Sa gipatuman nga curfew, niabot ngadto sa 64 ka menor nga ilang na-rescue ug  gisundan kini sa 841 nga nadakpan sa akto nga nanigarilyo diha sa publikong lugar.

Samtang padayon usab ang hugot nga pagpatuman sa Ordinansa nga nagdili nga mag-half naked nga magsuroy-suroy diha sa publiko diin 263 ka tawo ang ilang nadakpan nga nakalapas sa maong balaod.

Sa kalapasan sa trapiko niabot ngadto sa 1,697 ang naisyuhan og citation ticket ug nikabat ngadto sa P1,075,000 ang kinatibuk-ang kantidad sa multa nga nakolekta sa siyudad.

Sa laing bahin, niabot ngadto sa 43 gramos nga shabu nga nikantidad tanan ngadto sa P374,000 ang nasakmit  atol sa gipahigayong buy-bust  operation sa kapolisan diha sa Reclamation Area sa Barangay  Subangdaku, Siyudad sa Mandaue sa niaging kadlawon.

Si Police Lieutenant Colonel Wilfredo Alarcon, hepe sa City Intelligence Unit (CIU)  sa Mandaue City Police Office (MCPO) niila  sa ilang nadakpan nga si Glenn Cambaga,   21-anyos, taga Barangay Apas, Siyudad sa Sugbo.

Si Police Captain Troy John Lalamunan, hepe sa City Drug Enforcement Unit (CDEU) sa MCPO nagkanayon nga nakadawat sila og mga taho kalabot sa ilegal nga kalihokan sa suspetsado diha sa lugar hinungdan nga nipahigayon sila og buy-bust operation.

Ang suspetsado natingkagol karon sa detention cell sa MCPO gikatakdang pasakaan og tukmang kaso sa nahimo niya nga kalapasan. — BDB (FREEMAN)