Kompaniya nga namutol og mangrove gipasakaan og kaso

CEBU, Philippines — Gipasakaan og kaso ang usa ka construction company sa Barangay Tingub, dakbayan sa Mandaue labot sa giingong illegal nga pagputol sa mangrove diha sa Plaridel Interior, Barangay Paknaan sa naasoy nga siyudad.

Kasong kalapasan sa Section 77 ug 78 sa Presidential Decree(PD) 705 kun illegal cutting and destruction of Forestland ang gisang-at batok sa BNR Construction and Development Corporation nga gipasaka ni Maria Priscilla Melendres residente sa La Guardia, Barangay Lahug, dakbayan sa Sugbo.  Si Melendres nakahukom siya pagpasaka og kaso batok sa maong kompaniya kay personal niya nga nasaksihan niadtong Nobyembre 17, 2022 ang pagpamutol sa mga mangrove duol sa iyang propiyedad.  Matud pa ni Melendres giingong wala’y earth balling permit alang sa mga mangrove o special land use permit ang naasoyng construction company gikan sa Community Environment and Natural Resources Office(CCENRO) Cebu City.  Nasuta usab ni Melendres nga ang naasoyng construction company gi-hire sa Mandaue City Government alang sa pagpadako sa agianan sa tubig sa dapit gikan sa Butuanon River.  Gisuwayan og kuha ang habig sa BNR Construction labot sa kaso nga gipasaka batok nila apan wala pa silay gihatag nga tubag. Apan si Atty. Julius Caesar Entise sa habig sa kagamhanan sa dakbayan mihulagway nga pagpang-harass lang ang gihimo ni Melendres batok sa BNR Construction.

Gikwestiyon sa abogado kun nganong ang construction company ang gikiha ug wala’y labot ang siyudad nga maoy ni-hire sa construction  firm nga mitrabaho nga masolusyunan ang problema sa baha.

Matud ni Entise nga kompleto sila og dokomento ingon man permit gikan sa Department of Environment and Natural Resources apil naa ang pag earth ball sa maapektuhan nga mangrove. (BANAT NEWS)