Pagbayad og buhis sa mga kawani sa City Hall susihon

CEBU, Philippines — Sa dili pa gukdon ang mga tax delinquent sa kabarangayan, ang Task Force Sayaw sa Buhis gikatakdang mosusi usab sa record sa mga opisyal ug empleyado sa City Hall aron masuta kung nagbayad ba kini sa hustong buhis.

Kini aron magsilbi kini nga ehemplo alang sa kampanya sa kagamahanan alang sa saktong pagbayad og buhis.

Sa pakighinabi sa Banat News kang Ofelia Oliva, kanhi treasurer sa dakbayan, aduna siyay mga estratehiya nga wala pa mabuhat kaniadto nga iyang giduso karong panahona.

Nagkanayon si Oliva nga nakig-estorya na sab siya sa kasamtangang City treasurer nga si Ivy Reyes sa mga estratehiya nga iyang gihuna-huna aron masiguro nga magkatakdo ang ilang mga ideya.

Bisan og nagsugod na sila sa pagpadala og mga notisya sa mga tax delinquent sa lain-laing lugar sa dakbayan, matud ni Oliva, iyang tan-awonon ang community tax sa matag empleyado.

“I will start the campaign diri sa City Hall. I will look into the community tax of every employee, if they have paid correctly,” dugang pa niya.

Suma pa ni Oliva nga dili lang ang P5 nga basic tax ang angay nilang bayran.

“Dili biya kay P5 ra ang basis, kasagaran basic, P5 how about your salary?” matud pa ni Oliva. Ang dugang buhis sa komunidad nga P1 alang sa matag P1,000 nga kita bisan kung kini gikan sa negosyo, propesyon o kabtangan apan dili molapas sa P5,000 kinahanglan usab nga kolektahon sumala sa journal sa National Tax Research Center bahin sa buhis sa komunidad.

Alang sa bana ug asawa, ang usag usa kinahanglang mobayad sa basic P5 apan ang dugang buhis maggikan sa ilang kinatibuk-ang kabtangan nga gipanag-iya o ang mga resibo o kinitaan.

Gitataw ni Oliva nga way exempted ni bisan kinsa.

“Tanan gyud atong utingkaon. Walay muduol nga hangyo2x,” ni Oliva pa.

Kahinumdoman nga atol sa paglusad sa Sayaw para sa Buhis, sila si Mayor Michael Rama ug bise mayor Raymond Garcia nihatag og tag P2,000 matag usa gikan sa ilang kaugalingong bulsa ug gitunol ngadto kang City Treasurer Ivy Reyes nga gideklarar   nga usa ka “donasyon”.

Matud ni Oliva, klaro ang iyang instruksiyon sa mga miyembro sa “TF Sayaw” pagkolekta sa buhis pinaagi sa pagdasig. —Caecent No-ot Magsumbol/MEL (BANAT NEWS)