Mga turista pabayron na og environmental fees sa Lapu-Lapu

CEBU, Philippines —  Gitinguha sa konseho sa Siyudad sa Lapu-Lapu  ang pagkolekta og environmental fees sa mga turista nga mobisita sa mga  tourist spots sa siyudad sama sa mga beach resorts ug uban pa.

Natigayon ang maong tinguha pinaagi sa giduso sa ordinanbsahon ni Konsehal  Annabeth Cuizon nga gituki sa konseho sa miaging regular session.

Sa maong ordinansahon gipasabot ni Konsehal Cuizon nga ang makolekta nga environmental fees gikan sa mga turista maoy gamiton alang sa mga programa nga pagpanalipod ug pagpreserbar sa kalikopan sa siyudad ilabi na gayod sa mga marine resources niini ug kadagatan nga maoy kinaham sa mga turista nga bisitahon.

Gihimong panag-ingnan ni Cuizon ang gihimo sa Boracay ug Palawan nga mga tourist destinations mangolekta  gyud og environmental fees matag turista.

Sa pagkakaron, gawas lang sa mga dagkong resorts, kaning mga public ug private beaches sa siyudad, ang kolektahon sa mga nagbantay mao ra ang abangan sa cottages ug ang daghang mga kalalakin-ang mangolekta og tag P20 ngadto sa P30 nga parking fees matag sakyanan o motorsiklo nga walay resibong gihatag.

Way nasayod kun asa kini padung o kun duna bay bahin niini ang siyudad sa Lapu-Lapu.

Ang maong ordinansahon ni Cuizon ang gisumitir na ngadto sa City Attorney Office alang sa paghatag og komentaryo o pagdugang pa niini.