Stall owners sa Barracks sa Carbon, maayo ra og kita

CEBU, Philippines — Mga  stall owners  sa The Barracks sa  Carbon Public Market nipadayag sa ilang pagsuporta  sa pagpalambo sa maong merkado uban sa panghinaot nga dili unta masagolan og isyu o ba kaha mamantsahan og personal nga interes sa pipila nga supak sa kalamboan.

Gipahibalo sa stall owners sa maong bahin sa merkado nga wala sila mahimuot sa mga pasiatab nga matud pa nga hinay ang ilang halin tungod sa gihimong kausaban sa siyudad.

Matud pa nila maayo ra ilang negosyo kay daghan na ang anha mangompra sa Carbon kay hapsay na ug limpyo.

“Buot namo ipadayag sa publiko nga wala mi mahimuot sa nigawas nga balita sa giingong hinay nga halin diri sa The Barracks. And inadlaw-adlaw sa pagsuporta ug pag-ari sa mga tawo, nagpamatuod sa kalagsik sa among mga negosyo,” lakip sa natala nga mensahe sa  manifesto.

Kahinumdoman nga dunay nagpaila nga mga market vendors sa Carbon nga  nagprotesta atubangan sa City Hall sa niaging semana nga nipadayag nga naapektahan ang ilang halin ug panginabuhian tungod sa mga gipatumang lagda diha sa Carbon.

Sa statement sa grupo sa mga nagprotesta sila mipasangil nga sukad nga giusab ang merkado nimenus gyud ilang kita.

Partikular sa kausaban nga ilang gipasabot mao ang pagdili na sa mga sakyanan nga makasulod diha sa dalan MC Briones. Nasagmuyo sab sila nga gibutangan og tinda ang mismong tungatunga sa karsada.

Gipasangil sa grupong nagprotesta nga wala himoi og feasibility study ug public consultation ang ubang gipanghimong kausaban sa merkado.

Wala tan-awa kun haom o makaayo ba sa mga vendors ug sa mga konsumidor kining “pedestrianization”sa Carbon night market.  IBM (BANATNEWS)