Kawasan Falls ug canyoneering i-take over sa probinsiya

CEBU, Philippines — Dili lang ang rehabilitasyon sa Kawasan Falls ang i-take over sa Probinsya sa Sugbo kundili apil na ang regulasyon sa canyoneering activities didto sa lungsod sa Badian.

Gipadayag ni governor Gwen Garcia atol sa iyang pakigtagbo sa mga stakeholders sa canyoneering sa Badian nga usa ka komprehensibo nga guidebook ang ipagawas sa Kapitolyo alang sa maong extreme activity sa lungsod.

“Mopagawas ta og komprehensiba nga guidebook sa canyoneering dinhis Badian, sama sa uban usab nga mga dapit, para standard ta tibuok Probinsiya. Tungod kay mao ni pinakadaghan, Probinsiya mismo, Province of Cebu mismo ang motutok dinhi,” matod ni Garcia.

Sa pagkakaron temporaryong gisuspenso ang mga kalihokan ug canyoneering sa lungsod sa Badian human nga nasayran nga daghan ang mga debris nga delikado alang sa mga turista human sa pangusokuso sa bagyong Odette.

Ipademolish o ipaguba sab sa Kapitolyo ang mga struktura nga anaa sa easement zone sa Kawasan Falls.

Girevoke usab sa gobernador ang permit sa mga canyoneering operators sa Badian kansang mga patigayon wala ma rehistro sa Bureau of Internal Revenue (BIR).

Suma pa ni Romela Cortes, BIR supervisor nga sa 43 ka mga identified canyoneering operators ,16 lang niini ang nagbayad og buhis.

Nasayran ni Garcia nga ang canyoneering sa Badian mokita og di momenus P365 milyones matag tuig o P7 milyones matag semana. Apan kasagaran sa mga operators wala magbayad og tarong nga buhi nga matod pa nakapaalkansi sa gobyerno.

Si Garcia nihimo og inspeksyon didto sa Kawasan falls sa Badian niadtong Hunyo 21 uban sa mga lokal mga opisyal. (BANAT NEWS)