169 ka PDL nakatapos sa senior highschool sud sa prisohan .

CEBU, Philippines — Bisan paman sa pagkabilanggo gumikan sa nagkadaiyang kasaypanan, wa mapugngi nga nakapaso ug midawat sa diploma ang 169 ka persons deprived of liberty PDL sa Talisay City Jail human sila nakalampos sa pagtungha sa senior highschool.

Sa maong gidaghanon sa mga migradwar, 50 ang mga babaye samtang 119 ang mga lalaki.

Ang 37 anyos nga si Jomar (di tinuod nga pangalan) nagkanayon nga nalipay siya nga nakahuman sa pagtungha.

Wa man niya makuha kini samtang gawasnon pa pero nalipay lang siya nga sa bilangguan nakalampos siya ug nahatagan og kahigayonan nga maka-eskwela.

Nanghinaot siya nga mao kini ang makapahimuot sa iyang ginikanan ug pamilya.

Una niini ang Bureau of Jail Management and Penology (BJMP) nakig alayon sa pribadong unibersidad alang sa tinguha nga mapahuman sa senior highschool ang mga binilanggo.

Ang ilang estilo sa pagtudlo mao ang face to face ingon man modular nga paagi.

Kung makagawas naman gani sila sa bilangguan hayan mahimo na nila nga magamit ang ilang nakamahuan ug makapangita na sila og trabaho.

Ang Talisay City Jail - Male Dormitory nga gipanguluhan ni JSUPT Richard B Tulabing, Jail Warden, nipasalamat ngadto ni DR. Ferdinand Y. Tomakin, President sa Academia System Global Colleges ingon man sa faculty ug staff tungod sa ilang nakab-ot nga kalamposan nga nakapa-gradwar og 169 ka PDL.

Daku usab ang pasalamat sa kadagkuan sa bilangguan gumikan sa hugot nga pagsuporta sa lokal nga kagamhanan sa dakbayan sa Talisay pinaagi ni mayor Gerald Anthony “Samsam” Gullas Jr kinsa way hunong sa paghatag og tabang sa mga PDL ingon man sa ilang pasilidad.