CCPO naghimo og link analysis sa notadong hitman tali sa inmates

CEBU, Philippines —  Naghimo og operational research o link analysis ang Cebu City Police Office (CCPO) mahitungod sa partisipasyon ni John Bryan Fernandez sa duha ka high profile inmates kansang mga ngalan wala una gibutyag tungod kay aduna pay follow up operation nga gihimo.

Si Fernandez kinsa gitumbok sa kapolisan nga notadong hitman ang nadakpan atol sa buy-bust operation nga gipahigayon sa City Intelligence Unit sa Lapu-Lapu City Police Office sa niaging mga adlaw.

Sayo pa, gibutyag ni Police Colonel Ireneo Dalogdog, direktor sa CCPO nga si Fernandez niangkon nga siya ang responsable sa shooting incidents nga nahitabo sa mga barangay sa Inayawan, Suba ug Carreta.

Nahibaw-an usab ni Dalogdog nga ang mga high profile inmate nga nadakpan giingong nagsilbi usab nga middleman ni Fernandez.

Giingong samtang si Fernandez maghimo og krimen ang duha ka nahigutang inmates maoy kontakon niini ug mohatag og mga gamit alang sa himuon niining krimen.

Matud ni Dalogdog nga gawas sa iladong drug lord nga maghatag og instruction kang Fernandez giingong adunay laing contact si Fernandez sulod sa prisohan nga ilado gihapon nga drug personality nga maoy mo-follow up sa instructions nga ihatag.

“Ang ilahang naghatag sa ilaha og instruction naa pa sa sulod sa city jail known drug personality gihapon ni aside atong naa po’y mo contact kang John Fernandez naa gyud sa high profile nga drug known personality so mao gyud to tanang mga instruction gikan adto niya ug naa sad sila’y contact pod diri gihapon sa city jail nga mao po’y mohatag og follow up instruction kang John Bryan Fernandez”, padayag ni Dalogdog.

Nasuta nga kasagaran sa mga shooting incident nga nitumaw sa Cebu City may kalambigitan sa ilegal nga drugas ilabi na kadtong wala maka-remit.  – BDB (BANATNEWS)